উপ-ৰাষ্ট্ৰপতি হিচাপে দায়িত্বভাৰ গ্ৰহণ কৰাৰ পিছত প্ৰথমবাৰৰ বাবে মেঘালয় ভ্ৰমনলৈ আহিব এম ভেংকায়া নাইডু । উপ-ৰাষ্ট্ৰপতি নাইডুৱে এক বিশেষ কাৰ্যসূচীত অংশ লোৱাৰ উদ্দেশ্যে ১৬ এপ্ৰিলৰ দিনা উপস্থিত হ’ব ৰাজ্যখনত।
জানিব পৰা মতে উপ-ৰাষ্ট্ৰপতিগৰাকীয়ে উজনি শ্বিলঙৰ এডভান্স লেণ্ডিং গ্ৰাউণ্ডত অৱতৰণ কৰিব। আৰু তাৰ পৰা পোনে পোনে এক বিশেষ অনুষ্ঠানত অংশ লোৱাৰ উদ্দেশ্যে শ্বিলঙৰ নংথিম্মাইস্থিত ইণ্ডিয়ান ইনষ্টিটিউট অৱ মেনেজমেণ্ট (IIM)লৈ ৰাওনা হ’ব।
উল্লেখ্য যে ১৬ এপ্ৰিলৰ দিনা ৰাতিপুৱা ৯.৫৫ বজাত ৰাজ্যখনত উপস্থিত হ’ব উপ-ৰাষ্ট্ৰপতি ভেংকায়া নাইডু ।
পূব খাচি জিলাৰ যান-বাহন আৰক্ষী অধীক্ষক বি জে লালুৱে জানিবলৈ দি কয় যে উপ-ৰাষ্ট্ৰপতিগৰাকীৰ ভ্ৰমণ কালৰ সময়ত শ্বিলং নগৰৰ বাসিন্দা সকলে কিছু পৰিমানে অসুবিধাৰ সন্মুখীন হ’ব। ইয়াৰ উপৰি নিৰাপত্তাৰ প্ৰতি বিশেষ লক্ষ্য ৰাখি উপ-ৰাষ্ট্ৰপতিগৰাকীৰ ভ্ৰমণৰ সময়ত চহৰখনত যাতায়াত ব্যৱস্থা স্তব্ধ কৰি দিয়া হ’ব।
ইয়াৰ উপৰি যাতায়াত ব্যৱস্থা পুনৰ সূচল কৰি তুলিবৰ বাবে সকলো ধৰণৰ ব্যৱস্থা গ্ৰহণ কৰিব বুলিও জানিবলৈ দিয়ে যান-বাহন আৰক্ষী অধীক্ষক বি জে লালুৱে।
