মৰিগাওঁ জিলা সত্ৰ আৰু জিলা ন্যায়াধীশৰ আদালতে এটা হত্যাৰ গোচৰৰ ৰায়দানত মৰিগাওঁ জিলাৰ চাৰিজন লোকক যাৱজ্জীৱন কাৰদণ্ডেৰে দণ্ডিত কৰিছে।
সত্ৰ ন্যায়াধীশৰ আদালতত চলি থকা (নং ৪৬/২০১২ ) গোচৰটোৰ ৰায় দি আদালতে ভাৰতীয় দণ্ডবিধিৰ ৩০২ আৰু ৩৪ ধাৰাৰ অধীনত আব্দুল আজিজ, নবী হুছেইন, মফিজুদ্দিন আৰু চাইফুল ইচলামক যাৱজ্জীৱন কাৰদণ্ড দিয়ে।
উল্লেখযোগ্য যে আজিৰ পৰা প্ৰায় ৭ বছৰৰ পূৰ্বে এটা সামান্য তৰ্কাতৰ্কিৰ পিছত ৰাতি এই চাৰিজনে আমচৰ আলী নামৰ এজন লোকক হানি-খুচি হত্যা কৰিছিল। ঘটনাৰ দিনা দিনৰ ভাগত আমচৰ আলীয়ে এই চাৰিজনৰ পৰা তেওঁ কাম কৰাৰ বাবত পাব লগীয়া টকা আনিবলৈ গৈছিল। তাত ৫০ টকা পইচাৰ লগত আমচৰ আলী আৰু আন চাৰিজনৰ তৰ্কাতৰ্কি হৈছিল। ইয়াৰে প্ৰতিক্ৰিয়া হিচাপে ৰাতি ঘৰত শুই থকা অৱস্থাত আমচৰ আলীক এই চাৰিজন লোকে আক্ৰমণ কৰি হানি-খুচি গুৰুতৰভাৱে আহত কৰিছিল। দুদিন পিছত চিকিৎসালয়ত আমচৰ আলীৰ মৃত্যু হয়। পৰিয়ালৰ লোকে আব্দুল আজিজ, নবী হুছেইন, মফিজুদ্দিন আৰু চাইফুল ইচলামৰ বিৰুদ্ধে ভুৰাগাওঁ থানাত এজাহাৰ দিয়াৰ পিছত ৮২২/১১ নম্বৰৰ এটা গোচৰ ৰুজু হৈছিল।
মৰিগাওঁ সত্ৰ ন্যায়াধীশৰ আদালতে চাৰিওজনকে যাৱজ্জীৱন কাৰাদণ্ড দিয়াৰ লগতে প্ৰত্যেককে ২৫ হাজাৰ টকাকৈ জৰিমনা বিহিছে। জৰিমনা অনাদায়ে আন ৬মাহৰ সাধাৰণ কাৰাদণ্ডৰ নিৰ্দেশ দিয়া হৈছে।
