ৰঞ্জিত দাসো পিছ পৰি নাথাকিল : এন আৰ চিক লৈ অসন্তোষ প্ৰকাশৰ লগতে বিতৰ্কিত মন্তব্য বিজেপিৰ সভাপতিজনৰ
এন আৰ চিক লৈ বিভিন্ন বিতৰ্কিত মন্তব্য আৰু অসন্তোষ প্ৰকাশ কৰাসকলৰ তালিকাত নাম লিখালে ৰাজ্যত শাসনত থকা বিজেপিৰ ৰাজ্যিক সভাপতি ৰঞ্জিত দাসে। আজি সাংবাদিকৰ আগত এটা বিতৰ্কিত মন্তব্য কৰি এই শাৰীত থিয় দিয়ে সভাপতিজনে।
“অখিলঞ্জীয়া মূলৰ লোকক এন আৰ চিৰ চাৰ্কল ছুপাৰ্ভাইজাৰৰ দায়িত্ব অৰ্পণ কৰাৰ কাৰণেই বহু খিলঞ্জীয়া মানুহৰ নাম বাদ পৰিছে।” এইদৰে আজৱ মন্তব্য কৰে বিজেপিৰ ৰাজ্যিক সভাপতি ৰঞ্জিত দাসে।
আজি ৩ আগষ্টত বিজেপিৰ ৰাজ্যিক কাৰ্য্যালয়ত বিজেপিৰ মাহেকীয়া আলোচনী ‘বিজেপি বাৰ্তা’ উন্মোচন কৰাৰ পাছতেই এন আৰ চিক লৈ এই বিতৰ্কিত মন্তব্য কৰে সভাপতিজনে।
উল্লেখযোগ্য যে যোৱা ৩০ জুলাইত ৰাষ্ট্ৰীয় নাগৰিক পঞ্জীৰ চূড়ান্ত খচৰা প্ৰকাশ পোৱাৰ পাছতেই মুখ্য মন্ত্ৰী সৰ্বানন্দ সোণোৱালে সন্তুষ্টি প্ৰকাশ কৰি এই প্ৰক্ৰিয়াটোৰ সৈতে জড়িত বিষয়া-কৰ্মচাৰীসকলৰ যথেষ্ট অৰিহণা আছে বুলি স্বীকাৰ কৰিছিল। তাৰ বিপৰীতে বিজেপিৰ ৰাজ্যিক সভাপতি ৰঞ্জিত দাসে আজি ওলোটা মন্তব্য কৰাত সকলো আচৰিত হৈছে।
তেওঁ কয়, “বিভিন্ন ঠাইত দেখিছো অখিলঞ্জীয়া লোক চাৰ্কল প্ৰজেক্ট ছুপাৰভাইজাৰ হোৱাৰ কাৰণে সেই অঞ্চলসমূহত অন্য চাৰ্কলৰ তুলনাত খিলঞ্জীয়া লোকৰ নাম কিছু কমকৈ আহিছে।”
আনহাতে, চাৰ্কল প্ৰজেক্ট ছুপাৰ্ভাইজাৰসমূহৰ জাতি-জনগোষ্ঠী সন্দৰ্ভত জ্ঞান সীমিত হোৱাৰ বাবে আমাৰ যি খিলঞ্জীয়া বা ভাৰতৰ অন্য প্ৰদেশৰ ভাৰতীয় নাগৰিকৰ নামো অন্তৰ্ভুক্ত হোৱা নাই বুলিও তেওঁ সাংঘাতিক অজ্ঞনতাসম্ভূত মন্তব্য কৰে।
য’ত এন আৰ চি যাৰ নেতৃত্বত চলি আছে, সেইজন ৰাজ্যিক সমন্বয়ক প্ৰতীক হাজেলাই অখিলঞ্জীয়া, অনা অসমীয়া, তেনেস্থলত অনেকেই ৰঞ্জিত দাসৰ এই মন্তব্য অজ্ঞানতাৰ নামান্তৰ বুলি মত দিছে। আনহাতে নথিৰ ওপৰত ভৰসা কৰিহে এন আৰ চিত নাম সোমোৱা বা বাদ পৰাটো নিৰ্ভৰ নকৰে। চাৰ্কল প্ৰজেক্ট ছুপাৰভাইজাৰৰ ষ্টেটাছৰ ওপৰত নহয়।
এই মন্তব্যৰ উপৰি, বিজেপিৰ ৰাজ্যিক সভাপতিগৰাকীয়ে এন আৰ চি কৰ্তৃপক্ষক আহ্বান জনাই কয় “যাতে আগন্তুক দিনত যিসকল চাৰ্কল প্ৰজেক্ট ছুপাৰভাইজাৰ বা চাৰ্কলৰ ভিত্তিত যিসকল বিষয়াক নিযুক্তি দিয়া হ’ব, সেইসকলৰ ১০০ শতাংশই যেন খিলঞ্জীয়া লোকক নিয়োগ কৰে। তেতিয়াহে এখন শুদ্ধ ভাৰতীয় নাগৰিকৰ নাম থকা পূৰ্ণাংগ ৰাষ্ট্ৰীয় নাগৰিকপঞ্জী পাম।”
তাৎপৰ্য্যপূৰ্ণভাৱে, সংবাদ মাধ্যমৰ আগত ৰঞ্জিত দাসৰ এনে মন্তব্যই প্ৰমাণ কৰিছে বিজেপি চৰকাৰৰ দিনতে উচ্চতম ন্যায়ালয়ৰ সম্পূৰ্ণ তদাৰকত চলি থকা এনআৰচি উন্নীতকৰণ প্ৰক্ৰিয়াত ৰাজ্যিক বিজেপি মুঠেই সন্তুষ্ট নহয় তথা তেওঁলোকেও বৰ্তমান সময়ত খিলঞ্জীয়া-অখিলঞ্জীয়াক লৈ বিভাজনৰ ৰাজনীতিত উঠি-পৰি লাগিছে।
ইয়াৰোপৰি, তেওঁ এন আৰ চি কৰ্তৃপক্ষক পুনৰবাৰ আহ্বান জনাই কয় যে এন আৰ চিৰ কামত নিয়োজিত সেইসকল বিষয়া যাতে খিলঞ্জীয়া তথা ভাৰতীয় মূলৰ হয়, যাতে তেওঁলোকৰ ভাৰত সম্পৰ্কে সাম্যক জ্ঞান থাকে, তেনেকুৱা ব্যক্তিক এনে কামত নিয়োজিত কৰিলে নিশ্চয় এখন পূৰ্ণাংগ ভাল ভাৰতীয় থকা এন আৰ চি পাবলৈ সক্ষম হ’ব। অৰ্থাৎ বিধায়ক শিলাদিত্য দেবৰ দৰেই তেৱোঁ বৰ্তমানলৈকে হোৱা এন আৰ চিৰ কামত সন্দেহ প্ৰকাশ কৰে।
তদুপৰি উচ্চতম ন্যায়ালয়ে প্ৰব্ৰজনৰ প্ৰমাণ পত্ৰ আৰু শৰণাৰ্থীৰ প্ৰমাণ পত্ৰ থকা লোকসকলৰ নাম আঁতৰ কৰাৰ কোনো নিৰ্দেশ দিয়া নাই বুলিও তেওঁ সংবাদ মাধ্যমৰ আগত সদৰী কৰে।
আনহাতে, তেওঁ এন আৰ চি কৰ্তৃপক্ষক প্ৰব্ৰজন আৰু শৰণাৰ্থীৰ প্ৰমাণ পত্ৰ থকাসকলৰ আগন্তুক দিনত অন্তৰ্ভুক্ত কৰিবৰ বাবে অনুৰোধ জনায়। “তেনে লোক ২ লাখ ৪৮ হাজাৰ বাদ পৰি আছে, সেইসকল ভাৰতীয় মানুহ, গতিকে তেনে লোকৰ নাম অন্তৰ্ভুক্ত কৰিব লাগে বুলি আমি আবেদন জনাইছো।” এইদৰে কয় সভাপতিজনে।