ৰাজ্যত শীঘ্ৰেই আৰম্ভ হ’ব উচ্চমানৰ স্কুল ক্ৰিকেট টুৰ্ণামেণ্ট
স্কুল স্প’ৰ্টছ প্ৰমোচন ফাউণ্ডেশ্যন (এছ এছ পি এফ)ৰ অধীনত অসমৰ সকলো জিলাক সামৰি শীঘ্ৰেই এক উচ্চমানৰ স্কুল পৰ্যায়ৰ ক্ৰিকেট প্ৰতিযোগিতা আয়োজন কৰা হ’ব।
জানিব পৰা মতে, এছ এছ পি এফৰ অধীনত হ’বলগীয়া এই টুৰ্ণামেণ্টৰ পৰাই ৰাজ্যখনৰ স্কুলীয়া ক্ৰিকেটাৰে স্কুল ‘ইণ্ডিয়া কাপ’ত প্ৰতিদ্বন্দ্বিতা কৰাৰ সুযোগ লাভ কৰিব।
প্ৰাক্তন ৰঞ্জী ক্ৰিকেটাৰ তথা এছ এছ পি এফৰ ৰাজ্যিক সমন্বয়ক গৌতম হাজৰিকাই ১ জুনত গুৱাহাটীৰ চানমাৰিত আহ্বান কৰা এক সভাত এই সিদ্ধান্ত লোৱা হয়। উক্ত সভাত ৰাজ্যখনৰ ২৬ খন জিলাৰ প্ৰতিনিধিৰ লগতে অসম ক্ৰিকেট সন্থাৰ কেইবাজনো প্ৰতিনিধি আৰু প্ৰাক্তন ৰঞ্জী ক্ৰিকেটাৰো উপস্থিত আছিল।
সভাৰ অন্তত প্ৰাক্তন ৰাষ্ট্ৰিয় ক্ৰিকেটাৰ চেতন শৰ্মা, সংগঠক সঞ্জয় ভৰদ্বাজৰ লগতে বিভিন্নজনৰ সৈতে ভিডিঅ’ কনফাৰেন্সৰ যোগেদি সভাত উপস্থিত প্ৰতিনিধিসকলে বিভিন্ন বিষয়ৰ ওপৰত আলোচনা কৰিছিল।
কেন্দ্ৰীয় ক্ৰীড়া আৰু যুৱ কল্যাণ মন্ত্ৰণালয়, ছাই, দূৰদৰ্শন, মানৱ সম্পদ উন্নয়ন মন্ত্ৰণালয়, কেন্দ্ৰীয় বিদ্যালয় সংগঠন, নৱোদয় বিদ্যালয় সমিতি আৰু ১৮খন ৰাজ্যৰ শিক্ষা ব’ৰ্ডৰে গঠিত এছ এছ পি এফ হৈছে ৰাষ্ট্ৰীয় ক্ৰীড়া প্ৰসাৰ সংস্থাৰ দ্বাৰা স্বীকৃত সংস্থা। এই সংস্থাৰ দ্বাৰা ক্ৰিকেট, ফুটবল, বাস্কেটবল, এথলেটিকছ আৰু ভলীবলকে ধৰি মুঠ পাঁচটা ইভেণ্টত স্কুল পৰ্যায়ৰ পৰা দেশত ক্ৰীড়া উন্নয়নৰ লোৱা হৈছে।