চীঙমেইৰং বিধানসভা চৌহদত মণিপুৰ বিধানসভাৰ পূৰ্ণাংগ বাজেট অধিৱেশনৰ আৰম্ভণিৰ দিনা শুকুৰবাৰে ৰাজ্যখনৰ ৰাজ্যপাল নাজমা হেপতুল্লাই ভাষণ দিয়ে।
তেওঁৰ ভাষণত ৰাজ্যপাল ড০ হেপতুল্লাই স্বীকাৰ কৰে যে ৰাজ্য চৰকাৰে ৰাজ্যখনৰ বিভিন্ন সম্প্ৰদায়ৰ মাজত থকা আৱেগিক তথা উন্নয়নমূলক ব্যৱধান নিৰ্মূল কৰাৰ বাবে নিৰন্তৰ প্ৰচেষ্টা চলাইছে।
তেওঁ লগতে নিজৰ ভাষণত ‘মিয়ামগি নুমিট’ (ৰাইজৰ দিন) আৰু ‘হিল লীডাৰছ ডে’ৰ অধীনত ‘ৰাইজৰ সৈতে নিয়মিত আৰু নিৰ্দ্ধাৰিত মত-বিনিময়’ কাৰ্যসূচীৰ ওপৰত আলোকপাত কৰে।
মণিপুৰৰ মুখ্যমন্ত্ৰী এন বীৰেন সিঙে ৰাইজৰ নেতাসকলৰ সৈতে প্ৰতি মাহত দুদিন মত বিনিময় কৰে। ‘হিল লীডাৰছ ডে’ত প্ৰতি মাহৰ ১০ তাৰিখে আৰু ‘মিয়াম্গি নুমিট’ প্ৰতি মাহৰ ১৫ তাৰিখে অনুষ্ঠিত হয়। বিজেপি নেতৃত্বাধীন চৰকাৰখনে ২০১৭ ৰ মাৰ্চত কাৰ্যভাৰ গ্ৰহণ কৰাৰ পিছৰে পৰা এই কাৰ্যসূচী চলি আছে।
আইন শৃংখলা সম্পৰ্কত ৰাজ্যপালগৰাকীয়ে কয় যে চৰকাৰে উগ্ৰপন্থী গোটসমূহক মুলসুঁতিলৈ ঘুৰাই অনাৰ লক্ষ্যৰে আলোচনাৰ বাবে দুৱাৰ খোলা ৰাখিছে।
এই বছৰ বিভিন্ন উগ্ৰপন্থী গোটৰ প্ৰায় ৭৫ গৰাকী সদস্যই আত্মসমৰ্পন কৰিছে। একে সময়তে চৰকাৰে বহুদিন ধৰি পৰি থকা ৰাজ্যিক মানৱ অধিকাৰ আয়োগ উজ্জীৱিত কৰাৰ ব্যৱস্থা গ্ৰহণ কৰা হৈছে।
মহিলাৰ বিৰুদ্ধে বৰ্দ্ধিত অপৰাধৰ মোকাৱিলা কৰিবলৈ এখন ফাষ্ট ট্ৰেক কোৰ্ট স্থাপনৰ লগতে পূব ইম্ফলত তিনিখন নতুন ‘ফেমিলি কোৰ্ট’ স্থাপন কৰা হৈছে।
খাদ্য সুৰুক্ষাৰ বিষয়ে উল্লেখ কৰি তেওঁ সদনত জনায় যে চৰকাৰে বৰ্তমান অগ্ৰাধিকাৰ ভিত্তিত আৰু অন্ত্যোদয়া অন্ন যোজনাৰ অধীনত ২২,৪৭,৫৪৮ গৰাকী হিতাধিকাৰীলৈ মাহিলী ৰেচন আগবঢ়াইছে।
শিক্ষা খণ্ডত চৰকাৰে আগন্তুক বৰ্ষত ২০ কোটি টকা ব্যয় সাপেক্ষে পাঁচখন জিলাত আদৰ্শ বিদ্যালয় স্থাপনৰ ব্যৱস্থা লৈছে।
শক্তি খণ্ডত তেওঁ কয় যে লোকপিয়লৰ গণনা অনুসৰি থকা ২,৫৮২ খন গাওঁৰ ভিতৰত ২,৪৫৭ খন গাওঁলৈ ইতিমধ্যে বিদ্যুৎ যোগান ধৰিছে। বাকী ২৫ খন গাওঁক ২০১৯ ৰ ভিতৰত সামৰি লোৱা হ’ব।
শনিবাৰ আৰু দেওবাৰে কোনো কাৰ্যসূচী নোহোৱাৰ বাবে সদন সোমবাৰলৈ স্থগিত ৰখা হয়।
কাৰ্যসূচী অনুসৰি অহা ২৩ ফেব্ৰুৱাৰীত বাজেট অধিৱেশনৰ সামৰণি পৰিব।
