অসম চৰকাৰে ৰাজ চক্ৰৱৰ্তীক ৰাজ্য চৰকাৰৰ গড়কপ্তানি (গৃহ আৰু ৰাষ্ট্ৰীয় ঘাইপথ) বিভাগৰ আয়ুক্ত তথা বিশেষ সচিব হিচাপে নিযুক্তি দিছে।
এই দায়িত্ব গ্ৰহণৰ আগেয়ে চক্ৰৱৰ্তীয়ে উত্তৰ পূৰ্বাঞ্চলৰ গুৱাহাটীত ভাৰতৰ ৰাষ্ট্ৰীয় ঘাইপথ প্ৰাধিকৰণৰ (এনএইচএআই) মুখ্য মহা প্ৰৱন্ধক হিচাপে কাৰ্যনিৰ্বাহ কৰিছিল।
অসম চৰকাৰৰ পাৰ্চনেল (প্ৰশাসন) বিভাগৰ সচিব তপন চন্দ্ৰ শৰ্মাই জাৰি কৰা এক জাননীত প্ৰকাশ কৰিছে, ‘’ভাৰত ৰাষ্ট্ৰীয় ঘাইপথ প্ৰাধিকৰণৰ গুৱাহাটীস্থ উত্তৰ পূৰ্বাঞ্চলৰ আঞ্চলিক কাৰ্যালয়ত মুখ্য মহাপ্ৰৱন্ধক তথা আৱাসিক বিষয়া ৰাজ চক্ৰৱৰ্তীক অসম চৰকাৰৰ গড়কপ্তানি (গৃহ আৰু ৰাষ্ট্ৰীয় ঘাইপথ) বিভাগৰ আয়ুক্ত তথা বিশেষ সচিব হিচাপে নিযুক্ত দিয়া হৈছে…।‘’
২০১৮ ৰ ৩মাৰ্চৰ পৰা কাৰ্যকৰী হোৱাকৈ ৰাজ্য চৰকাৰে তেওঁক নিযুক্তি দিছে। ভাৰত চৰকাৰৰ পথ পৰিবহন আৰু ঘাইপথ মন্ত্ৰালয়ৰ নিৰ্দেশ মৰ্মে ডেপুটেশ্যনত এই দায়িত্ব লাভ কৰিছে চক্ৰৱৰ্তীয়ে।
‘’ ডেপুটেশ্যনৰ চৰ্তসমূহ পিছত গড়কপ্তানি বিভাগে নিয়মাৱলীৰ অধীনত চূড়ান্ত কৰিব,’’- জাননীখনত কোৱা হৈছে।
তথ্য অনুসৰি ৰুৰকীৰ ইণ্ডিয়ান ইনষ্টিটিউট অফ টেকনলজিৰ পৰা স্নাতকোত্তৰ ডিগ্ৰী লাভ কৰা চক্ৰৱৰ্তীৰ ইংলেণ্ডকে ধৰি বিভিন্ন বিদেশী ৰাষ্ট্ৰত কেইটামান গুৰুত্বপূৰ্ণ প্ৰকল্প ৰূপায়ন কৰাৰ অভিজ্ঞতা আছে।
শেহতীয়াভাৱে চক্ৰৱৰ্তীয়ে ব্ৰহ্মপুত্ৰৰ ওপৰত শৰাইঘাটৰ নতুন দলং নিৰ্মাণৰ কামত নিযুক্ত হৈছিল আৰু তাত তেওঁ নিজৰ সামৰ্থ দেখুৱাবলৈ সক্ষম হৈছিল। তদুপৰি তেওঁ ঘাইপথ আৰু দলং নিৰ্মাণৰ বহু প্ৰকল্পত দক্ষতাৰ পৰিচয় দাঙি ধৰিছে।
