ৰাধা কুমাৰী আৰু লালীমা দেৱীৰ হত্যাকাৰীক গ্ৰেপ্তাৰ : ৰে’লত কাপোৰ বিক্ৰী কৰা বিকাশ দাসে লৈছিল হত্যাৰ একে পন্থা

১০ জুলাইত ডিব্ৰুগড়-ৰঙিয়া এক্সপ্ৰে’ছত শিৱসাগৰ ষ্টেইশ্যন আৰু শিমলুগুৰি ষ্টেইশ্যনৰ মাজত সংঘটিত চাঞ্চল্যকৰ হত্যাকাণ্ডৰ হত্যাকাৰীক আজি আৰক্ষী গ্ৰেপ্তাৰ কৰিবলৈ সক্ষম হৈছে। পূৰ্বে এই ঘটনাত জড়িত বুলি কনক গগৈ নামৰ এজন মানসিকভাৱে অলপ গণ্ডগোল থকা লোকক আটক কৰিছিল আৰক্ষীয়ে।

কিন্তু শেহতীয়াকৈ বিকাশ দাস ওৰফে বুবু নামৰ এজনক তিনিচুকীয়াত ৰে’ল আৰক্ষীৰ হেড কনিষ্টবল মধুৰাম ডেকাই এই হত্যাকাৰীজনক আটক কৰা বুলি আৰক্ষীৰ সূত্ৰই জনাইছে। সূত্ৰটোৱে জনোৱা মতে, এই হত্যাকাৰীজন এজন ছিৰিয়েল কিলাৰ। শিৱসাগৰ-শিমলুগুৰি ষ্টেইশ্যনৰ মাজত হোৱা হত্যাকাণ্ডটোৰ ২৪ ঘণ্টাৰ পিছতে মৰিয়নিত যিটো একে ধৰণৰ হত্যাকাণ্ড হৈছিল, সেইটোও এই বিকাশ দাসেই সংঘটিত কৰিছিল।

উল্লেখযোগ্য যে শিৱসাগৰৰ ঘটনাটোৰ ২৪ ঘণ্টাৰ পিছতে যোৱা ১১ জুলাইত মৰিয়নিতো অৱধ আছাম এক্সপ্ৰে’ছত লালীমা দেৱী নামৰ আন এগৰাকী মহিলাৰ মৃতদেহ উদ্ধাৰ হৈছিল।

লক্ষণীয় কথাটো হ’ল দুয়োটা হত্যাকাণ্ড সংঘটিত হৈছিল বিশেষভাৱে সক্ষম লোকৰ দবাত আৰু দুয়োটা মৃতদেহ উদ্ধাৰ হৈছিল ৱাশ্বৰূমত। দুয়োটা মৃতদেহ ক্ষত-বিক্ষত অৱস্থাত আৰু ডিঙিত গামোচা মেৰিয়াই থোৱা অৱস্থাত পোৱা গৈছিল।

আৰক্ষীয়ে জানিবলৈ দিয়া মতে, হত্যাকাণ্ড দুটা তেৱেঁ সংঘটিত কৰা বুলি বিকাশ দাসে স্বীকাৰ কৰিছে আৰক্ষীৰ আগত। বিকাশৰ লগতে আন এজনো জড়িত আছে বুলি জানিব পৰা গৈছে। বিকাশে আগতে ৰেইল ষ্টেইশ্যনত চাহ দোকান দিছিল। শেহতীয়াভাৱে তেওঁ ৰে’লত কাপোৰ বিক্ৰী কৰাৰ বৃত্তি লৈছিল। তেওঁ এইদৰে এটা হত্যাকাণ্ড কৰি সাৰি যোৱাৰ পিছতে পুনৰ আন এটা হত্যাকাণ্ডৰ বাবে একে ধৰণৰ কৌশল লৈছিল বুলি জানিব পৰা গৈছে। আন এটা মন কৰিব লগীয়া সাদৃশ্য হ’ল যে দুয়োটা ঘটনাই সংঘটিত হৈছে বিশেষভাৱে সক্ষম লোকৰ বাবে সংৰক্ষিত দবাত।

দুয়োটা ঘটনাই অসমত ৰে’ল আৰক্ষীৰ থাকিলেও ৰে’ল যাত্ৰীসকলৰ সুৰক্ষাৰ নামত একো নাই, তাকে প্ৰমাণ কৰে। বিশেষকৈ সহজে মহিলাক টাৰ্গেট হয় ৰে’লত।