ৰেৱতী ফুকনৰ তথ্য দাখিলৰ বাবে আদালতৰ পৰা আৰু দুসপ্তাহ সময় ল’লে চৰকাৰে
যোৱা ২২ এপ্ৰিলৰ পুৱাৰে পৰা নিৰুদ্দেশ হৈ থকা আলফা-চৰকাৰৰ প্ৰথমলানি আলোচনাৰ বাবে গঠিত পি চি জিৰ অন্যতম সদস্য ৰেৱতী ফুকনৰ বিষয়ে ১৪ দিনৰ ভিতৰত প্ৰতিবেদন দাখিল কৰিবলৈ উচ্চতম ন্যায়ালয়ে কেন্দ্ৰীয় আৰু ৰাজ্য চৰকাৰক দিয়া সময়সীমা আজি অন্ত পৰে।
নিৰুদ্দিষ্ট ব্যক্তিজন সন্দৰ্ভত এতিয়াও কোনো উৱাদিহ উলিয়াব নোৱৰা ৰাজ্য চৰকাৰে আজি আদালতত অধিক সময় বিচাৰে।
আজি আদালতত অসম চৰকাৰৰ অধিবক্তাই জনায় যে চৰকাৰে সন্ধানহীন ৰেৱতী ফুকন সন্দৰ্ভত প্ৰতিবেদন প্ৰস্তুত কৰি আছে। কিন্তু এই প্ৰতিবেদন দাখিলৰ বাবে অতিৰিক্ত দুসপ্তাহ সময় বিচাৰে চৰকাৰী অধিবক্তাই।
উল্লেখযোগ্য যে ৰেৱতী ফুকনৰ পুত্ৰ কৌশিক ফুকনৰ আবেদনৰ ভিত্তিত এল নাগেশ্বৰ ৰাওৰ নেতৃত্বত গঠিত উচ্চতম ন্যায়ালয়ৰ দুজনীয়া বিচাৰপীঠ এখনে বিষয়টোৰ শুনানিৰ অন্তত যোৱা ১ জুনত এই ৰায় দিছিল। উচ্চতম ন্যায়ালয়ত দাখিল কৰা আবেদনখনত দেউতাক ৰেৱতী ফুকনৰ সন্ধান উলিওৱাত আৰক্ষী সম্পূৰ্ণ ব্যৰ্থ হোৱা বুলি অভিযোগ কৰিছিল পুত্ৰ কৌশিক ফুকনে।
আজি বিচাৰপীঠখনে চৰকাৰক প্ৰতিবেদন দিবৰ বাবে দুসপ্তাহ সময় দিয়া বুলি জানিব পৰা গৈছে।