দেওবাৰে এন ডি এ চৰকাৰৰ মন্ত্ৰীসকল শপত গ্ৰহণ চলি থকাৰ মাজত জম্মু-কাশ্মীৰত সন্ত্ৰাসবাদী আক্ৰমণত নিহত হয় ১০ গৰাকী তীৰ্থ যাত্ৰী। গুৰুতৰভাবে আহত হয় আন ৩৩ জন।
জম্মু-কাশ্মীৰৰ ৰিয়াছি জিলাৰ এটা মন্দিৰলৈ বাছেৰে উভতি আহিছিল তীৰ্থযাত্ৰীসকল। জম্মু-কাশ্মীৰ আৰক্ষীয়ে জনোৱা মতে, উভতি অহাৰ পথত উগ্ৰপন্থীয়ে তীৰ্থযাত্ৰী কঢ়িয়াই অনা বাছখন ঘেৰাও কৰি নিৰ্বিচাৰে গুলীচালনা কৰে। সন্ত্ৰাসবাদী আক্ৰমণৰ সময়ত বাছখন খাৱৈত বাগৰি পৰে। যাৰ বাবে ১০ জন তীৰ্থযাত্ৰীৰ মৃত্যু হয়।
আৰক্ষীৰ সূত্ৰ অনুসৰি শিৱখোৰা মন্দিৰৰ পৰা কাটৰালৈ গৈ আছিল বাছখন। মাজতে সংঘটিত হয় এই আক্ৰমণ।
আৰক্ষী সূত্ৰই জনাইছে যে ৰাজৌৰী, পুঞ্চ আৰু ৰিয়াছি জিলাৰ পাহাৰীয়া অঞ্চলত এদল সন্ত্ৰাসবাদীয়ে আত্মগোপন কৰি থকাৰ খবৰ পোৱা গৈছে। তেওঁলোকেই এই আক্ৰমণ সংঘটিত কৰা বুলি সন্দেহ কৰা হৈছে। সেই অঞ্চলসমূহত আক্ৰমণকাৰীক বিচাৰি উলিয়াবলৈ অভিযান চলোৱাৰ প্ৰস্তুতি চলোৱা হৈছে।
