এখন-দুখন নহয়; গুৱাহাটী ৰে’লৱে ষ্টেশ্যনত জব্দ ১৩ খনকৈ চুৰি বুলেট

গুৱাহাটী ৰে’লৱে ষ্টেশ্যনত ৰে’লৱে আৰক্ষীয়ে আজি পুৱা প্ৰায় ১০ বজাত এক অভিযান চলাই ১৩ খনকৈ চুৰি বুলেট জব্দ কৰিবলৈ সক্ষম হয়।

আৰক্ষীয়ে জব্দ কৰা বুলেট সমূহ দিল্লীৰ পৰা ইম্ফললৈ নিয়াৰ কথা আছিল বুলি জানিব পৰা গৈছে। আৰক্ষীয়ে উদ্ধাৰ কৰা বুলেটসমূহ দিল্লী, উত্তৰ প্ৰদেশ আৰু মণিপুৰৰ পঞ্জীয়নকৃত আছিল।

উল্লেখযোগ্য যে যোৱা ২৯ ছেপ্টেম্বৰৰ দিনা তিনিজন ব্যক্তি ক্ৰমে মহম্মদ ৱাহিদূৰ ৰহমান(৩৫), ৱাৰিছ খান(২৩) আৰু মমতাযোৰ ৰহমান(২২)ক ৰে’লৱে আৰক্ষীয়ে গ্ৰেপ্তাৰ কৰিছিল। গ্ৰেপ্তাৰ কৰা তিনিজনৰে ঘৰ নতুন দিল্লীৰ থাউৱেল জিলাত।

তেওঁলোকৰ পৰাও আৰক্ষীয়ে তিনিখনকৈ বুলেট জব্দ কৰিছিল। অৱশ্যে এই বাইক চুৰি কাণ্ডৰ মাষ্টাৰ মাইণ্ড বৰ্তমানো আৰক্ষীৰ জালত পৰা নাই।

ধৃত ৱাৰিছ খানৰ জ্যেষ্ঠ ভাতৃ সুৰজ খান এই বাইক চুৰি চক্ৰৰ মাষ্টাৰ মাইণ্ড বুলি আৰক্ষী সূত্ৰৰ পৰা জানিব পৰা গৈছে।

ইতিমধ্যে ৱাৰিছ খানক আৰক্ষীয়ে নিজৰ জিম্মাত ৰখাৰ বিপৰীতে বাকী দুজনক ন্যায়িক জিম্মালৈ প্ৰেৰণ কৰিছে।