বিজেপি শাসনাধীন বৰ্তমানৰ ৰাজ্য চৰকাৰে ৰাজ্যৰ শিক্ষাখণ্ডত আমূল পৰিৱৰ্তন আনিছে বুলি সততে কৰি অহা দাবী যে তেনেই অন্তঃসাৰশূণ্য আৰু ফোপোলা তাৰ এক প্ৰমাণ হৈছে গোৱালপাৰা জিলাৰ মাটিয়া শিক্ষাখণ্ডৰ অন্তুৰ্গত এখন বিদ্যালয়।
ন্যূনতম আন্তঃগাঠনিৰ অভাৱত জিলাখনৰ ১০৫২ নং খাৰদাং নৱাগত প্ৰাথমিক বিদ্যালয়খনৰ কণ কণ ছাত্ৰ-ছাত্ৰীসকলে শ্ৰেণীকোঠাত ছাতি মেলি গ্ৰহণ কৰিবলগীয়া হয় পাঠদান। যোৱা ৩ বছৰে বিদ্যালয়খনৰ গৃহত টিনপাত নথকাকৈ চলি আহিছে।
উল্লেখযোগ্য যে তিনি বছৰ পূৰ্বে অহা এজাক ধুমুহাত বিদ্যালয়খনৰ চালখন বতাহে উৰুৱাই নিছিল। সেই দিন ধৰি আজিলৈকে বিদ্যালয়গৃহটোৰ কোনো ধৰণৰ মেৰামতি কৰা নহ’ল।
যাৰ ফলত এতিয়া বৰষুণ নতুবা অতিপাত ৰ’দত ছাতি নহ’লে শ্ৰেণী কোঠাত পাঠদান কৰা অসম্ভৱ। বৰষুণ আহিলেই ছাত্ৰ-ছাত্ৰীসকলে শ্ৰেণী কোঠাৰ ভিতৰতে ছাতি মেলি লৈ পাঠগ্ৰহণ কৰে। ব্যতিক্ৰম নহয় শিক্ষকো, শিক্ষকেও ছাতি লৈয়ে পঢ়াব লাগে।
আনহাতে বৰষুণৰ পৰিমাণ বাঢ়িলে স্কুল ছুটি দিয়াৰ বাহিৰে বেলেগ আৰু কোনো উপায় নাথাকে। প্ৰতিটো বাৰিষাতে এনেদৰে চলি আহিছে খাৰদাং নৱাগত প্ৰাথমিক বিদ্যালয়খন।
বিদ্যালয়খনৰ প্ৰধান শিক্ষকৰ লগতে স্থানীয় ৰাইজে জনোৱা মতে বিভাগীয় কৰ্তৃপক্ষক এই সম্পৰ্কে বহুবাৰ আবেদন-নিবেদন কৰা হৈছে যদিও আজি পৰ্যন্ত কোনোধৰণৰ পদক্ষেপ গ্ৰহণ কৰা হোৱা নাই।
মন কৰিব লগীয়া যে গুণোৎসৱে শিক্ষাখণ্ডত আমূল পৰিৱৰ্তন অনা দাবী কৰা ৰাজ্য চৰকাৰে যোৱা চেপ্টেম্বৰ মাহৰ পৰা প্ৰাৰ্থমিক বিদ্যালয়সমূহত স্ব-গুণোৎসৱ কাৰ্যসূচী আৰম্ভ কৰাৰ কথা ঘোষণা কৰিছিল। যোৱা ৫ চেপ্টেম্বৰত শিক্ষা মন্ত্ৰী সিদ্ধাৰ্থ ভট্টাচাৰ্যই কৈছিল, ‘’গুণোৎসৱে শিক্ষা খণ্ডত আমূল পৰিৱৰ্তন আনিলে। অতি শীঘ্ৰে আমি সমগ্ৰ অসমতে স্ব-গুণোৎসৱ কাৰ্যসূচী হাতত ল’ম।‘
কিন্তু চৰকাৰে গুণোৎসৱ-স্বগুণোৎসৱ পাতি শিক্ষাৰ সংস্কাৰ আনিব বিছৰা সময়তে ৰাজ্যৰ এখন চৰকাৰী বিদ্যালয়ৰ এই পয়ালগা অৱস্থা, য’ত বৰষুণ অথবা অত্যধিক ৰ’দত ছাত্ৰ-ছাত্ৰীয়ে শ্ৰেণী কোঠাৰ ভিতৰত ছাতি মেলি পাঠ গ্ৰহণ কৰিব লগা অৱস্থা হয়।
