চত্তিছগড়ত নিৰাপত্তা বাহিনীৰ ওপৰত ভয়ংকৰ নক্সাল আক্ৰমণ। শনিবাৰে ৰাজ্যখনৰ সুকমা জিলাত সংঘটিত উক্ত আক্ৰমণত ১৭ গৰাকী জোৱান চহিদ হোৱাৰ লগতে আন ১৪ গৰাকী আহত হয়।
উল্লেখযোগ্য যে শনিবাৰে চত্তিছগড়ৰ সুকমা জিলাত নক্সালৰ সৈতে হোৱা এক সংঘৰ্ষৰ পিছৰে পৰা ১৭ গৰাকী জোৱান সন্ধানহীন হৈ আছিল আৰু আজি তেওঁলোকৰ মৃতদেহ উদ্ধাৰ কৰা হয়। আৰক্ষীৰ সূত্ৰত প্ৰকাশ।
এটা অনুসন্ধানকাৰী দলে জোৱান কেইগৰাকীৰ মৃতদেহ উদ্ধাৰ কৰে আৰু পিছত জংঘলৰ পৰা মৃতদেহসমূহ উলিয়াই অনা হয়। বাস্তাৰ অঞ্চলৰ আৰক্ষী মহা পৰিদৰ্শক পি ছুন্দৰৰাজে সংবাদ মাধ্যমক জনায়।
তেওঁ জনোৱা মতে শনিবাৰে ডিষ্ট্ৰিক্ট ৰিজাৰ্ভ গাৰ্ড (DRG), স্পেচিয়েল টাষ্ক ফ’ৰ্ছ (STF) আৰু চি আৰ পি এফ (CRPF)ৰ CoBRA বেটেলিয়নৰ প্ৰায় ৬০০ জোৱানে এলমাগুণ্ডা অঞ্চলত এক নক্সাল বিৰোধী অভিযান চলাইছিল।
‘অভিযানকাৰী দল মিনপা গাঁৱৰ জংঘলৰ ওচৰ পোৱাৰ লগে লগে প্ৰায় ২৫০ জনীয়া এটা বৃহৎ সশস্ত্ৰ বিদ্ৰোহীৰ দলে জোৱানসকলৰ ওপৰত ২ ঘণ্টাতকৈ অধিক সময় আক্ৰমণ চলাই, উক্ত আক্ৰমণত ১৪ গৰাকী জোৱান আহত হয়।‘ তেওঁ লগতে কয়।
তেওঁ আৰু কয়, ‘পিছত ১৭ গৰাকী জোৱান নিখোজ হৈ থকা বুলি জানিব পাৰি এক অভিযান চলোৱা হয় আৰু আজি তেওঁলোকৰ মৃতদেহসমূহ উদ্ধাৰ কৰি বাহিৰলৈ উলিয়াই অনা হয়।‘
আহত জোৱানসকলক ৰাইপুৰৰ এখন ব্যক্তিগতখণ্ডৰ হস্পিতালত ভৰ্তি কৰোৱা হৈছে, ইয়াৰে দুজনৰ অৱস্থা সংকটজনক।
