কে ৱাই কে এল (Kanglei Yawol Kanba Lup) নামৰ মণিপুৰৰ নিষিদ্ধঘোষিত উগ্ৰপন্থী গোটটোৰ দুগৰাকী মহিলা সদস্যক যোৱা ২ ডিচেম্বৰত এক অভিযানৰ সময়ত নিৰাপত্তা বাহিনীৰ এটা দলে আবেলি প্ৰায় ৩.৪৫ বজাত টেংনৌপালত গ্ৰেপ্তাৰ কৰে। গ্ৰেপ্তাৰ হোৱা সময়ত কে ৱাই কে এলৰ সদস্যা দুগৰাকী ম’ৰেৰ পৰা ইম্ফললৈ এখন যাত্ৰীবাহী গাড়ীৰে গৈ আছিল। আৰক্ষীৰ সূত্ৰই এই কথা কয়। আৰক্ষীৰ সূত্ৰটোৱে আৰু লগতে কয় যে এই সম্পৰ্কত অধিক তদন্ত চলি আছে। উল্লেখযোগ্য যে কে ৱাই কে এল হ’ল এটা মেইতেই বিদ্ৰোহী গোট আৰু এইটো ১৯৯৪ চনত গঠন কৰা হৈছিল।
