নিউ ইয়ৰ্কত সু-উচ্চ অট্টালিকাৰ অগ্নিকাণ্ডত ৯ শিশুসহ ১৯ জনৰ মৃত্যু
দেওবাৰে নিউয়ৰ্ক চহৰৰ এটা সুউচ্চ এপাৰ্টমেণ্ট অট্টালিকাত সংঘটিত ভয়ংকৰ অগ্নিকাণ্ডত ৯ শিশুসহ ১৯ জন লোকৰ মৃত্যু হয়।
চহৰখনৰ মেয়ৰ এৰিক এডামছে সংবাদ সংস্থা CNN ক জনোৱা অনুসৰি এই দুৰ্ঘটনাত ১৯ জন লোকৰ মৃত্যু নিশ্চিত হৈছে, লগতে আন কেইবাজনো লোকৰ অৱস্থা সংকটজনক।
মেয়ৰ এৰিক এডামছে CNN ক কয় যে দুৰ্ঘটনাটোত এতিয়ালৈকে ৬৩ জন লোক আহত হৈছে বুলি জানিব পৰা গৈছে।
তেওঁ এই ঘটনাক আমেৰিকাৰ শেহতীয়া ইতিহাসৰ আটাইতকৈ ভয়ংকৰ আৱাসিক অগ্নিকাণ্ড বুলি অভিহিত কৰে।
ব্ৰঙ্কছ চিৰিয়াখানাৰ পশ্চিমে কেইবাটাও ব্লকত থকা ইষ্ট ১৮১ ষ্ট্ৰীটৰ এটা ১৯ মহলীয়া অট্টালিকাৰ দ্বিতীয় আৰু তৃতীয় মহলাত ৰাতিপুৱা এই ভয়ানক অগ্নিকাণ্ড সংঘটিত হয়।
জুই নিৰ্বাপনৰ বাবে অগ্নিনিৰ্বাপক বাহিনীৰ কমেও ২০০ তকৈও অধিক কৰ্মী ঘটনাস্থলীত উপস্থিত হয়।
দুৰ্ঘটনাত আহত লোকসকলক ততাতৈয়াকৈ উন্নত চিকিৎসাৰ বাবে কাষৰে পাঁচখনকৈ চিকিৎসালয়ত ভৰ্তি কৰোৱা হয়।
অগ্নিকাণ্ডৰ কাৰণ সম্পৰ্কে বৰ্তমানলৈকে জানিব পৰা হোৱা নাই বুলি স্থানীয় কৰ্তৃপক্ষই সদৰী কৰিছে।