প্ৰদূষণৰ উৎসৱ! বিশ্বৰ প্ৰদূষিত দহ চহৰৰ তালিকাত দিল্লীসহ দেশৰ তিনি চহৰ

দেওবাৰে সমগ্ৰ দেশে পালন কৰিলে পোহৰৰ উৎসৱ দেৱালী। পিছে পোহৰৰ উৎসৱটি যেন হৈ পৰিছে প্ৰদূষণৰহে উৎসৱ। দেশ দেৱালীৰ আনন্দত মতলীয়া হোৱাৰ সময়তে দেশত বৃদ্ধি পাইছে প্ৰদূষণৰ ভয়াৱহতা।

আতচবাজীৰ ধোঁৱাই ছানি ধৰিছে দেশৰ আকাশ। প্ৰদূষণৰ এনে বৰ্ধিত মাত্ৰাৰ পৰিণতিত বিশ্বৰ আটাইতকৈ প্ৰদূষিত দহখন চহৰৰ তালিকাত অন্তৰ্ভুক্ত হৈছে ভাৰতৰ তিনিখন চহৰ। দিল্লীৰ লগতে এই তালিকা আছে মুম্বাই আৰু কলকাতা।

প্ৰদূষণৰ বাবে সততে বিপজ্জনক হৈ পৰা দেশৰ ৰাজধানী অঞ্চল নতুন দিল্লী এই তালিকাৰ শীৰ্ষস্থানত আছে। চুইজাৰলেণ্ডৰ গ্ৰুপ আইকিউএয়াৰ (IQAir)ৰ মতে, দিল্লীৰ বায়ুৰ গুণাগুণ সূচকাং (AQI) ৪২০।

প্ৰদূষণৰ এনে ভয়াৱহ মাত্ৰাৰ ফলত দিল্লীক ‘বিপজ্জনক’ শ্ৰেণীত অন্তৰ্ভুক্ত কৰা হৈছে। শীৰ্ষ দহত থকা আন দুই ভাৰতীয় চহৰ কলকাতা ১১৯৬ৰ AQIৰে চতুৰ্থ স্থানত থকাৰ বিপৰীতে বিত্তীয় ৰাজধানী মুম্বাই ১৬৩ AQI ৰে অষ্টম স্থানত আছে।

লক্ষনীয়ভাৱে দেওবাৰে নিশাৰ পৰা নতুন দিল্লীত ধোঁৱাৰ পৰিমাণ অতিমাত্ৰা বৃদ্ধি পোৱাৰ ফলত মাজনিশা দিল্লীৰ AQI আতংকজনকভাৱে ৬৮০ লৈ বৃদ্ধি পাইছিল।

উল্লেখ্য যে, ৪০০-৫০০ AQI স্তৰে সুস্থ লোককো প্ৰভাৱিত কৰে আৰু ৰোগাক্ৰান্ত লোকৰ বাবে অত্যন্ত বিপজ্জনক হৈ পৰে।

আনহাতে ১৫০-২০০ AQI স্তৰে হাঁপানী, হাওঁফাওঁ আৰু হৃদযন্ত্ৰৰ সমস্যা থকা লোকৰ বাবে সমস্যাৰ সৃষ্টি কৰে। ০-৫০ AQI স্তৰ ভাল বুলি গণ্য কৰা হয়।