উত্তপ্ত কাশ্মীৰত সোমবাৰে পুৱা সন্ত্ৰাসবাদীয়ে সংঘটিত কৰে ভয়ংকৰ কূটাঘাত।
উত্তৰ কাশ্মীৰৰ বাৰামুল্লাৰ ক্ৰিৰি নামৰ অঞ্চলটোত তহলদাৰী চি আৰ পি এফৰ দল এটাৰ ওপৰত পাকিস্তানী সন্ত্ৰাসবাদীয়ে ভয়ংকৰ আক্ৰমণ চলায়।
ৰাজপথত তালাচী চলাই থকা অৱস্থাতে সন্ত্ৰাসবাদীয়ে নিৰাপত্তা বাহিনীৰ দলটোক লক্ষ্য কৰি ধাৰাসাৰ গুলিবৰ্ষণ কৰিবলৈ আৰম্ভ কৰে।
এই আক্ৰমণৰ ঘটনাত কাশ্মীৰ আৰক্ষীৰ এজন বিশেষ আৰক্ষী বিষয়াৰ থিতাতে মৃত্যু ঘটে।
ঘটনাটোত গুৰুতৰ ভাবে আহত দুজন চি আৰ পি এফৰ জোৱানক চিকিৎসালয়লৈ নিয়া হয় যদিও তেওঁলোক দুজনৰে মৃত্যু ঘটা বুলি কাশ্মীৰ আৰক্ষীৰ মহাপৰিদৰ্শক বিজয় কুমাৰে প্ৰকাশ কৰিছে।
সন্ত্ৰাসবাদীৰ দলটোৱে আক্ৰমণ সংঘটিত কৰিয়েই ঘটনাস্থলীৰ পৰা পলায়ন কৰে। সন্ত্ৰাসবাদীৰ সন্ধানত নিৰাপত্তা বাহিনীয়ে সমগ্ৰ অঞ্চলটোতে তীব্ৰ অভিযান আৰম্ভ কৰিছে।
ইপিনে সেনাই কাশ্মীৰৰ পুলৱামাৰ পুজন নামৰ অঞ্চলটোৰ এখন দলঙৰ তলৰ পৰা এটা শক্তিশালী আই ই ডি উদ্ধাৰ কৰিবলৈ সক্ষম হয়।
আই ই ডিটো সময় মতে উদ্ধাৰ কৰাৰ ফলত এক বৃহৎ অঘটনৰ পৰা ৰক্ষা পৰিল অঞ্চলটো। বিগত কিছুদিন ধৰি কাশ্মীৰত সন্ত্ৰাসবাদীয়ে নিৰাপত্তা বাহিনীৰ ওপৰত আক্ৰমণ সংঘটিত কৰাৰ ঘটনা বৃদ্ধি পাইছে।
