২০০৮ চনৰ ৩০ অক্টোবৰৰ ধাৰাবাহিক বিস্ফোৰণৰ বলিসকলৰ প্ৰতি সুবিচাৰ কৰি আজি চিবিআইৰ বিশেষ আদালতে গোচৰটোৰ ঐতিহাসিক ৰায় দিছে।
মূল অভিযুক্ত তথা এন ডি এফ বিৰ প্ৰধান নেতা ৰঞ্জন দৈমাৰীক যাৱজ্জীৱন কাৰাদণ্ড বিহিছে আদালতখনে।
দুদিন আগত দোষীসকলৰ নাম ঘোষণা কৰা চিবিআইৰ বিশেষ আদালতখনে ৰঞ্জন দৈমাৰীৰ উপৰি আন ৯জন অভিযুক্তৰো একেই শাস্তি ঘোষণা কৰে। তাৰোপৰি আন ৪জনক ৫বছৰকৈ কাৰাদণ্ডৰ লগতে ৩ হাজাৰকৈ টকা জৰিমনা বিহে। ৫ বছৰ কাৰাদণ্ড পোৱা নীলিম দৈমাৰীয়ে ইতিপূৰ্বে কাৰাগাৰৰ ভিতৰত ৭টা বছৰ কটোৱা বাবে তেওঁৰ কাৰাবাসৰ পৰা মুক্তি পায়।
আদালতৰ তথ্য মতে, গোচৰটোত অভিযুক্ত ৩জনৰ ইতিপূৰ্বে মৃত্যু হৈছে আৰু ৪জন এতিয়াও পলাতক।
যাৱজ্জীৱন কাৰাদণ্ড পোৱাসকলৰ নাম ক্ৰমে, (১) ৰঞ্জন দৈমাৰী, (২) জৰ্জ বড়ো, (৩) অজয় বসুমতাৰী, (৪) ৰাজেন্দ্ৰ গয়াৰী, (৫) আনচাই বড়ো, (৬) খৰ্গেশ্বৰ বসুমতাৰী, (৭) লখৰা বসুমতাৰী, (৮) ইন্দ্ৰ ব্ৰহ্ম, (৯) বৈশাগী বসুমতাৰী আৰু (১০) ৰাজু সৰকাৰ।
আনহাতে ৫বছৰকৈ কাৰাদণ্ডৰ লগতে ৩ হাজাৰকৈ টকা জৰিমনাৰ শাস্তি পোৱা ৪জন ক্ৰমে, (১) জয়ন্তী ব্ৰহ্ম, (২) মথুৰাম ব্ৰহ্ম, (৩) প্ৰভাত বড়ো আৰু (৪) নীলিম দৈমাৰী। ইয়াৰে নীলিম দৈমাৰীৰ নিৰ্ধাৰিত কাৰাবাসৰ ম্যাদ ইতিমধ্যে সম্পূৰ্ণ হৈছে বাবে তেওঁ খালাচ পায়।
উল্লেখযোগ্য যে এন ডি এফ বি সশস্ত্ৰ বিদ্ৰোহী গোটে সংঘটিত কৰা বিস্ফোৰণলানি ইমানেই ভয়ংকৰ আছিল যে ইয়াৰ ফলত মুঠ ৮৮ জন লোক নিহত আৰু ৪৭০জন আহত হৈছিল। ইয়াৰ নৃশংসতাই সমগ্ৰ ৰাজ্যৰ অন্তৰাত্মা কঁপাই গৈছিল।
গুৱাহাটীৰ গণেশগুৰি, পাণবজাৰ আৰু ফাঁচিবজাৰৰ লগতে বৰপেটাৰোড, বঙাইগাঁও আৰু কোকৰাঝাৰত একে সময়তে কেইবাটাও শক্তিশালী বোমা বিস্ফোৰিত কৰা হৈছিল।
যোৱা ১০ বছৰ ধৰি চি বি আইৰ বিশেষ আদালতত গোচৰটো চলি থকাৰ পিছত ২৮ জানুৱাৰিত আদালতখনে অভিযুক্তসকলৰ ১৪জনক দোষী সাব্যস্ত কৰিছিল।
সংক্ষেপে কেইটামান গুৰুত্বপূৰ্ণ তথ্য-
- মুঠ ৮৮ জন নিহত
- ৪৭০জন আহত
- সাক্ষ্য লোৱা হ’ল মুঠ ৬৫০জনৰ
- বিচাৰ প্ৰক্ৰিয়াত সময় লাগিল প্ৰায় ১০ বছৰ
- দোষী সাব্যস্ত ১৪জন
- অভিযুক্ত এজনক দোষমুক্ত ঘোষণা
- ৰঞ্জন দৈমাৰীসহ ১০জনক যাৱজ্জীৱন কাৰাদণ্ড
- ৩জনক ৫বছৰকৈ কাৰাদণ্ড আৰু ৩ হাজাৰকৈ টকা জৰিমনা।
অসমৰ ৰাইজৰ লগতে ভুক্তভোগীসকলে উৎকণ্ঠাৰে অপেক্ষা কৰি থকা ৰায়টো অৱশেষত আজি ঘোষণা কৰে বিশেষ আদালতখনে। গোচৰটোত এন ডি এফ বিৰ অধ্যক্ষ ৰঞ্জন দৈমাৰীকে ধৰি মুঠ ২২জনক অভিযুক্ত কৰা হৈছিল। দীঘলীয়া শুনানি প্ৰক্ৰিয়াত মুঠ ৬৫০জন লোকৰ সাক্ষ্য গ্ৰহণ কৰা হয়।
আজিৰ ৰায়টোৰ পিছত কেন্দ্ৰৰ সৈতে শান্তি আলোচনা প্ৰক্ৰিয়া চলাই থকা বড়ো সশস্ত্ৰ সংগঠনটোৰ প্ৰতিক্ৰিয়া কি হ’ব সেয়া লক্ষণীয় হ’ব। ৰায় প্ৰদানৰ প্ৰাকমুহূৰ্তত সংগঠনটোৱে সংবাদ মাধ্যমক জানিবলৈ দিছিল যে ৰঞ্জন দৈমাৰীকে ধৰি সংগঠনটোৰ নেতা-সদস্যক বিস্ফোৰণটোত দোষী সাব্যস্ত কৰাটো হ’ব কেন্দ্ৰৰ সৈতে চলি থকা শান্তি প্ৰক্ৰিয়াৰ প্ৰতি এটা অশুভ সংকেত।
