যোৰহাট জিলাৰ টীয়ক নদীৰ বাঢ়নী পানীৰ সমান্তৰালকৈ বিগত কেইবাদিনো ধৰি হৈ থকা প্ৰবল বৰষুণৰ ফলত সৃষ্টি হোৱা আৱদ্ধ পানীত টীয়কৰ বঙালী গাঁৱৰ সমীপত ৩৭ নং ৰাষ্ট্ৰীয় ঘাইপথ দুদিন ধৰি পানীৰ তলত বুৰ গৈ আছে।
টীয়ক নগৰৰ দক্ষিণ-পূৱ কোণত থকা লেতেকু পথাৰৰ সমীপত মেৰামতি বিহীনভাৱে থকা টীয়ক নদীৰ মথাউৰিৰে নগৰাঞ্চললৈ নদীখনৰ বাঢ়নী পানীৰ সোঁত বৈছে ।
এই বানৰ ফলত টীয়ক নদীৰ দুয়ো পাৰে থকা আবাসীক অঞ্চলসমূহো পানীত বুৰ গৈছে ।
উল্লেখযোগ্য যে, ৰাষ্ট্ৰীয় ঘাইপথ সম্প্ৰসাৰণৰ কাম অতি লেহেমীয়া হোৱা, পথৰ কাষত নিৰ্মাণ কৰা পকী নলা সমূহ অপৰিকল্পিতভাৱে নিৰ্মাণ কৰা তথা একাংশ লোকে নভৱা-নিচিন্তাকৈ পকী গৃহ,পকী দেৱাল আদি নিৰ্মাণ কৰাৰ ফলত পানী নিস্কাশনৰ সকলো পথ বন্ধ হৈ পৰাত এনেদৰে টীয়ক নগৰৰ মাজমজিয়াত অচলাৱস্থাৰ সৃষ্টি হৈছে ।
৩৭ নং ৰাষ্ট্ৰীয় ঘাই পথৰ ওপৰেদি পানী বাগৰাত যান-বাহন,পথাচাৰীৰ চলাচলত ব্যাঘাত জন্মা দেখা গৈছে।
চাৰিলেন যুক্ত পথৰ নিৰ্মাণ কাম আৰম্ভ হোৱাৰে পৰা এই সমস্যাই প্ৰতিবছৰে আৱাসী সকলৰ মাজত হাহাকাৰৰ সৃষ্টি কৰি আহিছে l
আনহাতে, সমস্যাটোৰ সমাধানৰ সুত্ৰ বিচাৰি ৰাইজে বহুবাৰ প্ৰশাসন তথা পথ নিৰ্মাতা কোম্পানীক সমস্যা সম্পৰ্কে অৱগত কৰি স্মাৰকপত্ৰ প্ৰদান কৰাৰ পাছতো এই মুহুৰ্তলৈকে কোনো সুফল নোপোৱাত এতিয়া ক্ষোভিত হৈ পৰিছে স্থানীয় জনতা।
তদুপৰি, টীয়ক চাহ বাগিছা, হাতখোলা, নদীতলি, বাঁহবাৰী, চাকুলীবৰ, উলুবাৰী আদি এলেকাৰ লগতে টীয়ক-বলমা- নকছাৰী পথৰ প্ৰথম অংশও এই বানৰ ফলত প্লাবিত হৈ পৰিছে।
