নদীত বাগৰি পৰিল যাত্ৰীবাহী বাহন: আটাইকেইগৰাকী যাত্ৰীৰ মৃত্যুৰ সম্ভাৱনা

মঙলবাৰে নিশা জম্মু-কাশ্মীৰত সংঘটিত হৈছে এক শোকাৱহ দুৰ্ঘটনা। চাৰিগৰাকী যাত্ৰী থকা এখন বাহন কাশ্মীৰৰ প্ৰেমনগৰ অঞ্চলত চেনাব নদীত ডুব যোৱাৰ ফলত আটাইকেইগৰাকী যাত্ৰীৰ মৃত্যুৰ আশংকা কৰা হৈছে।

এক বিবৃতিত থাথ্ৰীৰ ছাব-ডিভিজনেল মেজিষ্ট্ৰেট আথাৰ আমিন জৰগাৰে কয়, “ডোডাৰ প্ৰেমনগৰ অঞ্চলত যাত্ৰাৰত এখন গাড়ী চেনাব নদীত ডুব যোৱাৰ ফলত চাৰিগৰাকী লোকৰ মৃত্যু হোৱাৰ আশংকা কৰা হৈছে।”

ইফালে কেন্দ্ৰীয় মন্ত্ৰী জীতেন্দ্ৰ সিঙে দুৰ্ঘটনাটোত সন্ধানহীন হোৱা সকলৰ সন্ধান উলিওৱাৰ বাবে সম্ভৱপৰ সকলো প্ৰচেষ্টা কৰাৰ লগতে স্থানীয় কৰ্তৃপক্ষৰ সৈতে নিৰন্তৰ যোগাযোগ ৰক্ষা কৰি আছে বুলি মন্তব্য কৰে।

ঘটনাৰ পাছতে উদ্ধাৰকাৰী বিষয়াসকল ঘটনাস্থলীত উপস্থিত হয় আৰু উদ্ধাৰ অভিযান আৰম্ভ কৰে। ঘটনাৰ সঠিক বিৱৰণ পিছত সদৰী কৰা হ’ব বুলি এগৰাকী আৰক্ষী বিষয়াই জানিবলৈ দিয়ে।