অসমৰ সকলো উচ্চ বিদ্যালয়ক ২০২২ চনৰ ভিতৰত উচ্চতৰ মাধ্যমিক বিদ্যালয় ৰূপত উন্নীতকৰণ কৰা হ’ব- বুধবাৰে এই কথা ঘোষণা কৰিছে অসমৰ শিক্ষা মন্ত্ৰী ৰণোজ পেগুৱে।
এই ঘোষণাৰ অংশ স্বৰূপেই অতি কম সময়ৰ ভিতৰত ৰাজ্যৰ ৪৫ খন উচ্চ বিদ্যালয়ক উচ্চতৰ মাধ্যমিক বিদ্যালয়লৈ উন্নীতকৰণ কৰা হ’ব বুলি জনাইছে শিক্ষা মন্ত্ৰী গৰাকীয়ে।
শিক্ষা মন্ত্ৰীৰ ঘোষণা অনুসৰি চিৰাং আৰু শোণিতপুৰৰ ৫ খন উচ্চ বিদ্যালয়ক উচ্চতৰ মাধ্যমিক বিদ্যালয়লৈ উন্নীত কৰা হ’ব।
সেইদৰে গোলাঘাট আৰু ওদালগুৰিৰ ৩ খনকৈ বিদ্যালয়ে এই তালিকাত স্থান পাইছে।
আনহাতে দৰং, ডিব্ৰুগড়, গোৱালপাৰা, ধুবুৰী, মৰিগাঁও আৰু বৰপেটা জিলাৰ ২ খনকৈ বিদ্যালয় উচ্চতৰ মাধ্যমিক বিদ্যালয় ৰূপে উন্নীত হ’ব।
বিশ্বনাথ, তিনিচুকীয়া, শিৱসাগৰ, কাছাৰ, লখিমপুৰ, কোকৰাঝাৰ আৰু হাইলাকান্দিৰ এখনকৈ উচ্চ বিদ্যালয়ক উন্নীতকৰণ কৰি উচ্চতৰ মাধ্যমিকৰ মৰ্য্যদা দিয়া হ’ব।
অৱশ্যে বিদ্যালয় সমূহক উন্নীতকৰণ কৰিলেও ইয়াৰ শিক্ষকৰ পদসমূহ চৰকাৰে পূৰণ কৰিব পাৰিব নে নোৱাৰে সেইয়া লক্ষণীয় হ’ব।
