অসমত বৃদ্ধি পাব আৰু পাঁচ খন নতুন বিশ্ববিদ্যালয়।
ৰাজ্যৰ পাঁচ খন আগশাৰীৰ মহাবিদ্যায়ক বিশ্ববিদ্যালয়লৈ উন্নীত কৰা হ’ব।
মুখ্যমন্ত্ৰী হিমন্ত বিশ্ব শৰ্মাই এই ঘোষণা কৰিছে।
গুৱাহাটী চিকিৎসা মহাবিদ্যালয় চিকিৎসালয়ৰ প্ৰেক্ষাগৃহত আজি অনুষ্ঠিত হোৱা উত্তৰ-পূব শৈক্ষিক সমাৰোহত অংশগ্ৰহণ কৰি মুখ্যমন্ত্ৰীগৰাকীয়ে এই মন্তব্য কৰে।
তেওঁ কয় যে নতুন শিক্ষা নীতিৰ আধাৰতে ৰাজ্যৰ পাঁচ খন মহাবিদ্যালয়ক দুবছৰৰ ভিতৰত বিশ্ববিদ্যালয়লৈ উন্নীত কৰা হ’ব।
কিন্তু বিশ্ববিদ্যালয়লৈ উন্নীত কৰিবলগীয়া পাঁচ খন মহাবিদ্যালয়ৰ তালিকাত কি কি মহাবিদ্যালয়ৰ নাম আছে বাৰু?
বিশ্ববিদ্যালয়লৈ উন্নীত কৰিবলগীয়া মহাবিদ্যালয়ৰ ভিতৰত যোৰহাটৰ জে বি কলেজ,শিৱসাগৰৰ শিৱসাগৰ কলেজ,গুৱাহাটীৰ সন্দিকৈ কলেজৰ লগতে লখিমপুৰ আৰু নগাঁৱৰ দুখন কলেজ আছে।
আজিৰ এই অনুষ্ঠানত কেন্দ্ৰীয় শিক্ষা মন্ত্ৰী ধৰ্মেন্দ্ৰ প্ৰধানৰ লগতে অসমৰ শিক্ষামন্ত্ৰী ৰণোজ পেগুও উপস্থিত থাকে।
অসম চৰকাৰে ৰাষ্ট্ৰীয় শিক্ষানীতি ৰূপায়ণ কৰাৰ বাবে এখন উচ্চস্তৰীয় সমিতি গঠন কৰা বুলিও মুখ্যমন্ত্ৰীগৰাকীয়ে প্ৰকাশ কৰে।
তেওঁ লগতে কয় যে পাঁচ খন মহাবিদ্যালয়ক বিশ্ববিদ্যালয়লৈ উন্নীত কৰাৰ বিষয়টো ২৫ নৱেম্বৰত অনুষ্ঠিত হ’বলগীয়া কেবিনেট বৈঠকত খৰচি মাৰি আলোচনা কৰা হ’ব।