উত্তৰ প্ৰদেশত সংঘটিত হৈছে এক মৰ্মান্তিক দুৰ্ঘটনা। হিন্দু ধৰ্মাৱলম্বীসকলৰ এক ধৰ্মীয় শোভাযাত্ৰাৰ সময়তে বিদ্যুৎস্পৃষ্ট হৈ মৃত্যুমুখত পৰিছে পাঁচগৰাকীকৈ তীৰ্থযাত্ৰী। এই শোকাৱহ ঘটনাত আন কেইবাগৰাকীও তীৰ্থযাত্ৰী আহত হৈছে।
যোৱানিশা মীৰাট জিলাৰ ৰালি চৌহান নামৰ এখন গাঁৱত সংঘটিত হৈছে এই ঘটনা। হিন্দু ধৰ্মৰ আৰাধ্য দেৱতা শিৱৰ আৰাধনাৰে অনুষ্ঠিত হোৱা কানৱাৰ যাত্ৰাত ভাগ লৈ হৰিদ্বাৰত পবিত্ৰ গংগা নদীৰ পৰা পানী লৈ উভতি অহাৰ সময়তে এই দুৰ্ঘটনা সংঘটিত হয়।
তীৰ্থযাত্ৰী কঢ়িয়াই অনা বাহনখন গাঁৱত প্ৰৱেশ কৰাৰ সময়তে বিপজ্জনকভাৱে ওলমি থকা হাই ভল্টেজ কাৰেণ্টৰ এডাল কেবুলত লাগে আৰু মুহূৰ্ততে বাহনখন জ্বলি উঠে। এই আকস্মিক ঘটনাৰ কোনো ভূ পোৱাৰ পূৰ্বেই বাহনৰ ভিতৰত থকা যাত্ৰীসকলো বিদ্যুৎস্পৃষ্ট হয়।
ইফালে ঘটনাৰ পিছতে সমগ্ৰ গাঁওখনত এক আতংকময় পৰিস্থিতিৰ সৃষ্টি হয়। স্থানীয় লোকসকলে বিদ্যুৎ যোগান বন্ধ কৰিবলৈ বিদ্যুৎ কেন্দ্ৰলৈ ফোন কৰিলে যদিও ইতিপূৰ্বেই সংকটাপন্ন হৈ পৰে বিদ্যুৎস্পৃষ্ট তীৰ্থযাত্ৰীসকলৰ স্বাস্থ্যৰ অৱস্থা।
বিদ্যুৎস্পৃষ্ট তীৰ্থযাত্ৰীসকলৰ এগৰাকীৰে ঘটনাস্থলীতে মৃত্যু হোৱাৰ বিপৰীতে আন চাৰিগৰাকীৰ চিকিৎসালয়লৈ নিয়াৰ পথত মৃত্যু হয়। আনহাতে গুৰুতৰভাৱে আহত পাঁচগৰাকী লোকক কাষৰীয়া চিকিৎসালয়ত ভৰ্তি কৰোৱা হৈছে। ইয়াৰ দুগৰাকীৰ অৱস্থা সংকটজনক বুলি জানিব পৰা গৈছে।
এই শোকাৱহ ঘটনাক কেন্দ্ৰ কৰি উত্তেজিত হৈ উঠে স্থানীয় লোকসকল। গাঁওবাসীসকলে এই ঘটনাৰ বাবে বিদ্যুৎ বিভাগক জগৰীয়া কৰি পথ অৱৰোধেৰে প্ৰতিবাদ সাব্যস্ত কৰে আৰু এই গাফিলতিৰ বাবে বিদ্যুৎ বিভাগৰ বিষয়াসকলৰ বিৰুদ্ধে শীঘ্ৰে ব্যৱস্থা গ্ৰহণৰ দাবী জনায়।
