এক মৰ্মান্তিক কাণ্ড সংঘটিত হৈছে উত্তৰ প্ৰদেশৰ লক্ষ্ণৌত। চহৰখনৰ হাটা হজৰত চাহাব অঞ্চলৰ এটা বাসগৃ্হত দুটা এল পি জি চিলিণ্ডাৰ বিস্ফোৰণৰ ফলত একেটা পৰিয়ালৰ ৫ জন লোক নিহত হৈছে।
এই ঘটনাত লগতে চাৰিজন লোক গুৰুতৰভাৱে আহত হয়। মঙলবাৰে নিশা প্ৰায় ১০.৩০ বজাত কাকোৰী থানাৰ অন্তৰ্গত অঞ্চলটোত সংঘটিত হয় এই ঘটনা।
বিস্ফোৰণৰ পূৰ্বে শ্বৰ্ট চাৰ্কিটৰ ফলত অগ্নিকাণ্ড সংঘটিত হোৱা বুলি জানিব পৰা গৈছে। জুইয়ে ছানি ধৰাৰ ফলত চিলিণ্ডাৰ দুটাৰ বিস্ফোৰণ ঘটি এই হৃদয়বিদাৰক ঘটনা সংঘটিত হয়।
ঘটনাৰ খবৰ লাভ কৰাৰ পিছতে অগ্নিনিৰ্বাপক বাহিনীৰ তিনিটা দল উপস্থিত হয় আৰু স্থানীয় লোকৰ সহযোগত জুই নিৰ্বাপন কৰে।
আৰক্ষীয়ে জানিবলৈ দিয়া মতে, পৰিয়ালটোৰ ৯ জন সদস্যক ততাতৈয়াকৈ স্থানীয় চিকিৎসালয়লৈ লৈ যোৱা হয় যদিও তিনি শিশুসহ পাঁচজনৰ মৃত্যু হয়।
নিহত লোককেইগৰাকীক মুছিৰ (৫০), তেওঁৰ পত্নী হুছন বানো (৪৫), ৰাইয়া (৭), উমা (৪) আৰু হিনা (২) বুলি চিনাক্ত কৰা হৈছে।
আনহাতে ইছা (১৭), লাকাব (২১), আমজাদ (৩৪) আৰু আনম (১৮) নামৰ আনকেইজন লোক সম্প্ৰতি চিকিৎসাধীন হৈ আছে বুলি আৰক্ষীয়ে লগতে জানিবলৈ দিয়ে।
