দেশত উদ্বেগজনকভাৱে বৃদ্ধি পাইছে নাৰীজনিত অপৰাধৰ ঘটনা। ধৰ্ষণৰ দৰে নিকৃষ্ট ঘটনাৰ পৰা ৰক্ষা পৰা নিষ্পাপ শিশুও। দেশত বৰ্ধিত এনে ঘটনাৰ সময়তে মধ্য প্ৰদেশৰ ইন্দোৰত এটি ৮ বৰ্ষীয় কন্যা শিশুক অপহৰণ কৰি ধৰ্ষণৰ চেষ্টা চলায় এগৰাকী ৫০ বৰ্ষীয় ব্যক্তি।
ইতিমধ্যে আৰক্ষীয়ে অভিযুক্ত ব্যক্তিগৰাকীক গ্ৰেপ্তাৰ কৰিছে। আৰক্ষীয়ে জানিবলৈ দিয়া মতে এই ঘটনা ৫ নৱেম্বৰৰ সন্ধিয়া সংঘটিত হৈছিল। ঘটনাৰ এক চিচিটিভি ফুটেজ আৰক্ষীয়ে ইতিমধ্যে উদ্ধাৰ কৰিছে।
উক্ত ভিডিঅ’টোত চহৰীয়াৰ মিৰ্জা নামৰ অভিযুক্তগৰাকীক শিশুটিক তেওঁৰ সৈতে লৈ যোৱা দেখিবলৈ পোৱা যায়। স্থানীয় কানাদিয়া আৰক্ষী থানাৰ ভাৰপ্ৰাপ্ত জগদীশ প্ৰসাদ জামৰে জানিবলৈ দিয়া মতে খাজৰানাৰ বাসিন্দা অভিযুক্ত মিৰ্জাই খেলি থকা শিশুটিক এখন নিৰ্জন স্থানলৈ লৈ যায়।
আঠ বৰ্ষীয় শিশুটিৰ কাপোৰ খুলি উলংগ কৰিবলৈ চেষ্টা কৰাৰ সময়তে কেইগৰাকীমান স্থানীয় লোকে দেখা পায় আৰু শিশুটিক উদ্ধাৰ কৰে। ইয়াৰ পিছতে স্থানীয় লোকসকলে আৰক্ষী চকীত উপস্থিত হয় আৰু মিৰ্জাৰ বিৰুদ্ধে ব্যৱস্থা গ্ৰহণৰ দাবী জনায়।
স্থানীয় লোকৰ অভিযোগৰ ভিত্তিত আৰক্ষীয়ে যৌন অপৰাধৰ পৰা শিশুৰ অপহৰণ আৰু সুৰক্ষা (পকচো) আইনকে ধৰি বিভিন্ন ধাৰাৰ অধীনত এক গোচৰ ৰুজু কৰে আৰু অভিযুক্ত মিৰ্জাক গ্ৰেপ্তাৰ কৰে।
