আশংকা কৰাৰ দৰেই প্ৰদূষণে গ্ৰাস কৰিছে ৰাজ্যৰ ৰাজধানী চহৰ গুৱাহাটীক। এসময়ত প্ৰদূষণমুক্ত গুৱাহাটী লাহে লাহে দেশৰ ভিতৰতে আটাইতকৈ প্ৰদূষিত চহৰলৈ পৰিণত হৈছে। বায়ুৰ গুণাগুণ সূচকাংকৰ অহৰহ অৱনতিৰ ফলত চহৰখনে আজিৰ দিনটোত বিশ্বৰ ভিতৰতে নৱম স্থানত অধিষ্ঠিত হোৱাৰ লগতে দেশৰ ভিতৰত শীৰ্ষ স্থানত অৱস্থান কৰিছে।
আজিৰ দিনটোত গুৱাহাটীৰ এয়াৰ কুৱালিটি ইনডেক্স হৈছে ২১১ আৰু দিল্লীৰ এয়াৰ কুৱালিটি ইনডেক্স হৈছে ২০৮। ২০২ সূচাংকৰেৰে গুৱাহাটীৰ মাজৰে দিছপুৰ আচে তৃতীয় স্থানত।
ইমানৰ পাছতো বগাহাতীত পৰিণত চৰকাৰৰ প্ৰদূষণ নিয়ন্ত্ৰণ ব’ৰ্ডে সাৰ পোৱা নাই। ইফালে মহানগৰীৰ চাৰিওদিশে নিৰ্মীয়মান উৰণীয়া সেতু, ছয়লেণ্ডযুক্ত ৰাষ্ট্ৰীয় ঘাইপথ, সুউচ্চ আট্টালিকা আৰু ক্ৰমবৰ্ধমান যান বাহনে গুৱাহাটীৰ বায়ুক অধিক প্ৰদূষিত কৰি তুলিছে।
ইতিমধ্যে বায়ু প্ৰদূষণৰ ফলত শিশুসহ বহু লোকে শ্বাস-প্ৰশ্বাসজনিত সমস্যাত ভুগিছে। অবাধ বায়ু প্ৰদূষণৰ ফলত শ্বাস-প্ৰশ্বাসজনিত সমস্যাত ভুগি শিশু কিশোৰসহ বহু লোকে চিকিৎসাধীন হ’বলগীয়া হৈছে। জিএমচিএইচৰ অধীক্ষক ডাঃ অভিজিৎ শৰ্মাই জনোৱা মতে, ৩৬ গৰাকী শিশু আৰু কিশোৰক এতিয়ালৈ চিকিৎসালয়ত ভৰ্তি কৰোৱা হৈছে। অৱশ্যে বৰ্তমান সকলো শিশুৰ অৱস্থা সুস্থিৰ বুলি উল্লেখ কৰিছে শৰ্মাই।
চিকিৎসাধীন বেছিভাগৰ ক্ষেত্ৰতে ব্ৰংকিঅ’লাইটিছ, হাঁপানী আৰু নিউমোনিয়াৰ দৰে সমস্যাৰ দেখা গৈছে। শ্বাস-প্ৰশ্বাসৰ জটিলতাৰ বাবে বিগত ২৪ ঘণ্টাত ৩৬টা শিশুক চিকিৎসালয়ত ভৰ্তি কৰোৱা হৈছে। এই ৩৬টা শিশুৰ ভিতৰত ২৫টা শ্বাস-প্ৰশ্বাসজনিত সমস্যাত ভুগি আছিল।
ইফালে জি এম চি এইচৰ অধীক্ষকে নাগৰিকসকলক ঘৰৰ পৰা ওলাই গ’লে মাস্ক পিন্ধিবলৈ আৰু শিশুসকলক ঘৰৰ ভিতৰতে আৱদ্ধ কৰি ৰাখিবলৈ আহ্বান জনাইছে। তদুপৰি, লোকে শ্বাস-প্ৰশ্বাসত অস্বস্তি অনুভৱ কৰাৰ লগে লগে স্বাস্থ্যকৰ্মীৰ পৰা তৎক্ষণাত পৰামৰ্শ ল’বলৈ আহ্বান জনাইছে চিকিৎসকে।
শেহতীয়াকৈ ৰাষ্ট্ৰীয় সেউজ ন্যায়াধিকৰণে চাম চৰকাৰক বায়ু প্ৰদূষণ আৰু কঠিন আৱৰ্জনা নিষ্কাশনৰ সমস্যাৰ বিৰুদ্ধে যুঁজিবলৈ ৰোড মেপ প্ৰস্তুত কৰিবলৈ এখন সমিতি গঠন কৰিবলৈ নিৰ্দেশ দিছে।
এন জি টিয়ে নিজৰ আদেশত উল্লেখ কৰিছে যে, সংশ্লিষ্ট সমিতিখনে অসমৰ অন্যান্য প্ৰান্তৰ লগতে গুৱাহাটীৰ বায়ুৰ গুণাগুণৰ ওপৰত নিয়মীয়াকৈ পৰীক্ষা ৰাখিব লাগিব। ইয়াৰ উপৰিও ইয়াত কোৱা হৈছে যে ইয়াৰ নাগৰিকসকলৰ বাবে প্ৰদূষণমুক্ত পৰিৱেশ নিশ্চিত কৰাটো ৰাজ্য চৰকাৰ আৰু স্থানীয় প্ৰশাসনৰ সাংবিধানিক দায়িত্ব।
