সম্প্ৰতি ফ্ৰান্সে এক বৃহৎ ৰাজনৈতিক অস্থিৰতাৰ সন্মুখীন হৈছে। ৰাষ্ট্ৰপতি ইমানুৱেল মেক্ৰনে, চেবাষ্টিয়ান লে কৰ্নেলৰ নতুন প্ৰধানমন্ত্ৰী হিচাপে নিযুক্তি দিয়াৰ বিৰুদ্ধে দেশজুৰি ব্যাপক প্ৰতিবাদ দেখিবলৈ পোৱা গৈছে। পেৰিছকে ধৰি বিভিন্ন চহৰত শ শ ৰাজপথলৈ ওলাই আহিছে প্ৰতিবাদকাৰী। বাছত জুই জ্বলোৱাৰ পৰা ৰে’লৰ বিদ্যুৎ যোগান বিচ্ছিন্ন কৰালৈকে হিংসাত্মক কাৰ্যকলাপ সংঘটিত হৈছে। স্বৰাষ্ট্ৰ মন্ত্ৰী ব্ৰুনো ৰিটেইল’ই অভিযোগ কৰিছে যে প্ৰতিবাদকাৰীসকলে ‘বিদ্ৰোহৰ পৰিৱেশ’ সৃষ্টি কৰিবলৈ চেষ্টা চলাইছে।
প্ৰতিবাদকাৰীৰ প্ৰশ্ন—ৰাষ্ট্ৰপতি ইমানুৱেল মেক্ৰনে কিয় চেবাষ্টিয়ান লে কৰ্নেলক নতুন প্ৰধানমন্ত্ৰী হিচাপে নিৰ্বাচিত কৰিলে? পৰিস্থিতি নিয়ন্ত্ৰণৰ বাবে আৰক্ষীয়ে কন্দুৱা গেছ নিক্ষেপ কৰিবলগীয়া হয়। সংবাদ সংস্থা এ পিৰ মতে, এতিয়ালৈকে কমেও ২০০ জন প্ৰতিবাদকাৰীক গ্ৰেপ্তাৰ কৰা হৈছে।
‘সকলো অৱৰোধ’ৰ আহ্বানৰ সৈতে ৰাজপথত নামিছে প্ৰতিবাদকাৰীসকল। এই প্ৰতিবাদৰ বাবে অনলাইনৰ জৰিয়তে আহ্বান জনোৱা হৈছিল, যদিও ৰাজহুৱা স্থানত কোনো নেতা প্ৰকাশ্যে ওলাই নাহিল। পৰিস্থিতি নিয়ন্ত্ৰণৰ বাবে অতিৰিক্ত আৰক্ষী মোতায়েনৰ লগতে বেৰিকেড স্থাপন কৰা হৈছে। তথাপিও অশান্তিৰ খবৰ অব্যাহত আছে।
ফ্ৰান্সৰ অৰ্থনৈতিক সংকট আৰু নাগৰিকৰ দৈনন্দিন খৰচ বৃদ্ধিয়ে এই পৰিস্থিতৈক অধইক উত্তেজিত কৰিছে। উগ্ৰ সোঁপন্থী ৰাষ্ট্ৰীয় সমাৱেশে এই সংকটক ৰাজনৈতিক আহিলা হিচাপে ব্যৱহাৰ কৰিছে। শেহতীয়াকৈ প্ৰাক্তন প্ৰধানমন্ত্ৰী ফ্ৰান্সোৱা বেৰুডৰ বিৰুদ্ধেও প্ৰতিবাদ হৈছিল। সোমবাৰে ফ্ৰান্সৰ সংসদৰ ৫৭৭ জন সদস্যৰ ভিতৰত ৩৩১ জনে বেৰুডৰ বিৰুদ্ধে ‘অনাস্থা’ ভোট দিয়ে, যাৰ ফলত তেওঁ পদত্যাগ কৰিবলৈ বাধ্য হয়। বিগত বছৰৰ ডিচেম্বৰত প্ৰধানমন্ত্ৰী হোৱা বেৰুডে মাত্ৰ ৯ মাহৰ ভিতৰত এই ভোটত পৰাজিত হয়।
ইয়াৰ পূৰ্বে, ২০২৪ৰ ৪ ডিচেম্বৰত তৎকালীন প্ৰধানমন্ত্ৰী মিচেল বাৰ্নিয়েৰো ‘অনাস্থা’ ভোটত পৰাজিত হৈছিল। বাওঁপন্থী আৰু উগ্ৰ সোঁপন্থী সদস্যৰ বিৰোধিতাৰ ফলত তেওঁ পদত্যাগ কৰে। ফ্ৰান্সত এই দ্বিতীয়বাৰৰ বাবে একেৰাহে প্ৰধানমন্ত্ৰী ‘অনাস্থা’ ভোটত পৰাস্ত হৈছে।
