কোৱাৰেন্টাইন চেন্টাৰত সৰ্প দংশনত মৃত্যু ঘটিছে এটি ৬ বছৰীয়া কন্যা শিশুৰ।
ঘটনাটো সংঘটিত হৈছে সোমবাৰে উত্তৰাখণ্ডৰ নাইনিতাল জিলাৰ এটা কোৱাৰেন্টাইন চেন্টাৰত।
নাইনিতাল জিলাৰ দণ্ডাধীশ শিৱম বাঞ্চালে জনোৱা অনুসৰি যোৱা সোমবাৰে কোৱাৰেন্টাইন চেন্টাৰত তাইৰ পৰিয়ালৰ সৈতে মজিয়াৰ বিচনাত শুই থকা অৱস্থাত কিশোৰাগৰাকীক সাপে দংশন কৰে।
শিশুটিক বেটালঘাট সামূহিক চিকিৎসালয়ৰ পৰা তেলী চেঠী নামৰ ঠাইৰ এখন বিদ্যালয়ৰপৰা পৰিৱৰ্তিত কৰা কোৱাৰেন্টাইন চেন্টাৰলৈ অনা হৈছিল।
ঘটনা সংক্ৰান্তত ৰাজহ বিভাগৰ উপ-পৰিদৰ্শক ৰাজপাল সিং, গাঁও উন্নয়ন বিষয়া উমেশ যোশী আৰু সহকাৰী শিক্ষক কৰণ সিঙক ভাৰতীয় দণ্ডবিধি আইনৰ ৩০৪ এ ৰ অধীনত গ্ৰেপ্তাৰ কৰা হৈছে বুলি জিলা দণ্ডাধীশে জনাইছে।
জানিব পৰা মতে শিশুটিৰ পৰিয়ালৰ লোকে ইতিমধ্যে ৰাজপাল সিঙক কোৱাৰেন্টাইন চেন্টাৰটোত সাপৰ বিপদজনক উপস্থিতিৰ সম্পৰ্কে অৱগত কৰিছিল যদিও কোনো ব্যৱস্থা গ্ৰহণ কৰা নাছিল।
ফলত সৰ্পৰ দংশনত অকালতে মৃত্যুক সাৱটি ল’ব লগা হয় ৬ বছৰীয়া কন্যা শিশুটি।
শিশুটিৰ পৰিয়ালটো কিছুদিনৰ পূৰ্বে দিল্লীৰ পৰা উভতি আহি উক্ত কোৱাৰেন্টাইন চেন্টাৰটোত আছিল।
উল্লেখ্যে, পাহাৰীয়া অঞ্চলত অৱস্থিত কোৱাৰেন্টাইন চেন্টাৰটোত পানীৰ অভাৱ ঘটাৰ লগতে অতি অপৰিষ্কাৰ বুলি অভিযোগ দাখিল কৰাও হৈছিল।
মহেশ চন্দ্ৰ নামৰ কোৱাৰেন্টাইনত থকা প্ৰাথমিক বিদ্যালয়ৰ এজন শিক্ষকে কৈছে যে উক্ত চেন্টাৰটোৰ টয়লেট অতি কদৰ্যময় হোৱাৰ লগতে দুৱাৰবোৰো ভঙা।
