উদুলি-মুদুলি নগাঁৱৰ নেহৰুবালি : আৰম্ভ হ’ল ষষ্ঠ উত্তৰ-পূব শিশু গ্ৰন্থমেলা
আজিৰ পৰা ৮ দিনীয়াকৈ উত্তৰ-পূব শিশু গ্ৰন্থমেলা সমিতিৰ উদ্যোগত আৰু নগাঁও জিলা প্ৰশাসনৰ সহযোগত আৰম্ভ হৈছে ষষ্ঠ সংখ্যক উত্তৰ-পূব শিশু গ্ৰন্থমেলা। গ্ৰন্থৰ সুৱাসেৰে উদ্ভাসিত হৈ পৰিছে নগাঁও চহৰৰ ঐতিহ্যমণ্ডিত কলঙৰ বাকৰি নেহেৰুবালিৰ প্ৰদীপ শইকীয়া ক্ষেত্ৰ।
আজি পুৱা গ্ৰন্থমেলাৰ পতাকা উত্তোলনেৰে গ্ৰন্থমেলাৰ কাৰ্যসূচীৰ শুভাৰম্ভ কৰে গ্ৰন্থমেলা উদযাপন সমিতিৰ কাৰ্যকৰী সভাপতি তথা নগাঁও সদৰ সমষ্টিৰ বিধায়ক ৰূপক শৰ্মাই।
ইয়াৰ পিছতে শ্বহীদ তৰ্পন অনুষ্ঠান মুকলি কৰে গ্ৰন্থমেলাৰ উপ-সভাপতি তথা জ্যেষ্ঠ সাংবাদিক কনক হাজৰিকাই। ইয়াৰ আগতে আজি পুৱা গ্ৰন্থমেলা উদযাপন সমিতিৰ সভাপতি তথা জলসম্পদ মন্ত্ৰী কেশৱ মহন্তই প্ৰদীপ শইকীয়া ক্ষেত্ৰত উপস্থিত হৈ গ্ৰন্থমেলাৰ অগ্ৰগতিৰ বুজ লয়।
বিয়লি গ্ৰন্থমেলাৰ দ্বাৰ উন্মোচন কৰি দিয়া ভাষণত নগাঁও জিলা উপায়ুক্ত বিশ্বজিৎ পেগুৱে নেহৰুবালিত আজিৰ পৰা আৰম্ভ হোৱা উত্তৰ-পূব শিশু গ্ৰন্থমেলাই সকলোকে গ্ৰন্থৰ সুবাস বিলাব বুলি মন্তব্য কৰে।
আনহাতে, সন্ধিয়া গ্ৰন্থমেলাত অংশগ্ৰহণ কৰা গ্ৰন্থ বিপনীৰ লগত জড়িত গ্ৰন্থ বান্ধৱ সকলক সম্বৰ্ধনা জনোৱা হয়। ইয়াৰ পিছত গান্ধাৰ সংগীত বিদ্যালয়ৰ উদ্যোগত অনুষ্ঠিত সাংস্কৃতিক অনুষ্ঠানত শিল্পী সকলৰ গীত নৃত্যৰে মুখৰিত হৈ পৰে নেহৰুবালি।
এইবাৰ গ্ৰন্থমেলাত ৰাজ্যৰ লগতে বহিঃৰাজ্যৰ গ্ৰন্থ বিপনী আৰু প্ৰকাশন পৰিষদে অংশগ্ৰহণ কৰিছে।