উৎসৱৰ আনন্দত বিঘিনি: গণেশ মূৰ্তি বিসৰ্জন দিবলৈ গৈ মৃত্যুক সাবটিলে সাতগৰাকীয়ে
শুকুৰবাৰে নিশা হাৰিয়ানাত গণেশ উৎসৱৰ আনন্দত বিঘিনি ঘটাই সংঘটিত হৈছে শোকাৱহ দুৰ্ঘটনা। দহদিনীয়াকৈ আয়োজন কৰা গণেশ উৎসৱৰ কালি সামৰণিৰ দিনা গণেশ মূৰ্তি বিসৰ্জন অনুষ্ঠানৰ সময়ত ৰাজ্যখনৰ দুখন জিলাত ৭ জনকৈ লোকৰ সলিল সমাধি ঘটে।
নদীত গণেশৰ মূৰ্তি বিসৰ্জন কৰিবলৈ যোৱাৰ সময়ত ৰাজ্যখনৰ চনিপতত তিনিজন লোকৰ মৃত্যু হোৱাৰ বিপৰীতে মহেন্দ্ৰগড়ত আন চাৰিজন লোকৰ মৃত্যু হয়।
উল্লেখ্য যে ৩১ আগষ্টৰ পৰা আৰম্ভ হোৱা ১০ দিনীয়া গণেশ চতুৰ্থী উৎসৱ শুকুৰবাৰে সামৰণি পৰিছিল। উৎসৱৰ সামৰণিৰ পিছত বিশাল শোভাযাত্ৰাৰে ভক্তসকলে গণেশৰ মূৰ্তি বিসৰ্জনৰ বাবে নদীলৈ কঢ়িয়াই নিছিল।
এনেদৰে মূৰ্তি বিসৰ্জনৰ বাবে যোৱা চনিপতৰ মিমাৰপুৰ ঘাটত পুত্ৰ আৰু ভতিজাসহ এগৰাকী ব্যক্তি নদীত ডুব গৈ মৃত্যুমুখত পৰে। আনহাতে মহেন্দ্ৰগড়ত গণেশৰ মূৰ্তি বিসৰ্জন কৰিবলৈ যোৱা প্ৰায় ৯ গৰাকী লোকক পানীৰ তীব্ৰ ঢৌৱে উটুৱাই নিয়ে।
ইয়াৰে আঠজন ব্যক্তিৰ মৃতদেহ কিছুসময় পাছত উদ্ধাৰ কৰা হয়। ইতিমধ্যে মৃতদেহ কেইটা মৰণোত্তৰ পৰীক্ষাৰ বাবে প্ৰেৰণ কৰা হৈছে বুলি দুইখন জিলাৰ স্থানীয় আৰক্ষীয়ে জানিবলৈ দিয়ে।
ইফালে এই ঘটনা সন্দৰ্ভত ৰাজ্যখনৰ মুখ্যমন্ত্ৰী মনোহৰলাল খট্টৰে শোক প্ৰকাশ কৰি মৃতকৰ পৰিয়াললৈ সমবেদনা জনায়। আনহাতে এনে দুৰ্ঘটনাত কেইবাগৰাকী ব্যক্তিক এনডিআৰএফৰ উদ্ধাৰকাৰী দলে জীৱন্তে উদ্ধাৰ কৰে বুলি সদৰী কৰি কৰি তেওঁ এই আহতসকলৰ দ্ৰুত আৰোগ্য কামনা কৰে।