দেশৰ ইতিহাসৰ এক কলংকিত অধ্যায় গুজৰাটৰ নৃশংস গোধৰা কাণ্ডৰ সময়ত সংঘটিত হোৱা বিলকিছ বানো দলবদ্ধ ধৰ্ষণকাণ্ডৰ দোষীৰ মুক্তিক প্ৰত্যাহ্বান জনাই উচ্চতম ন্যায়ালয়ত দাখিল কৰা আবেদনৰ আজি শুনানি গ্ৰহণ কৰে উচ্চতম ন্যায়ালয়ে।
শীৰ্ষ আদালতে আজি বিলকিছ বানোৰ গোচৰৰ সম্পূৰ্ণ ৰেকৰ্ড দাখিল কৰিবলৈ গুজৰাট চৰকাৰক নিৰ্দেশ দিয়ে। ন্যায়াধীশ অজয় ৰাস্তোগী আৰু বিভি নাগাৰাথনাৰ বিচাৰপীঠে গুজৰাট চৰকাৰক গোচৰটোৰ সৈতে জড়িত সকলো প্ৰাসংগিক ৰেকৰ্ড দাখিল কৰিবলৈ দুসপ্তাহৰ সময় দিছে।
আজি বিচাৰপীঠে বিলকিছ বানো গোচৰত দোষী সাব্যস্ত হোৱা দোষীৰ মুক্তিৰ বিৰুদ্ধাচাৰণ কৰি গুজৰাট চৰকাৰৰ বিৰুদ্ধে তৃণমূল কংগ্ৰেছৰ সাংসদ মহুয়া মৈত্ৰই দাখিল কৰা আবেদনৰ শুনানি গ্ৰহণ কৰে।
ইয়াৰ পূৰ্বে শীৰ্ষ আদালতে ভাৰতীয় কমিউনিষ্ট পাৰ্টি (মাৰ্ক্সবাদী)ৰ পলিটব্যুৰো সদস্য সুভাষিনী আলী, সাংবাদিক ৰেৱতী লাউল আৰু সমাজকৰ্মী আৰু অধ্যাপক ৰূপ ৰেখা বাৰ্মাই দাখিল কৰা আবেদনৰ আধাৰত গুজৰাট চৰকাৰলৈ জাননী জাৰি কৰিছিল।
আদালতে তিনি সপ্তাহৰ পিছত গোচৰটোৰ পৰৱৰ্তী শুনানি গ্ৰহণ কৰা হ’ব বুলি আজি ঘোষণা কৰিছে।
উল্লেখ্য যে ২০০২ চনৰ গুজৰাটৰ নৃশংস গোধৰা সাম্প্ৰদায়িক সংঘৰ্ষৰ সময়ত সেই সময়ৰ ২১ বৰ্ষীয় বিলকিছ বানোক দলবদ্ধ ধৰ্ষণ কৰা হৈছিল। সেই সময়ত বানো আছিল ৫ মহীয়া গৰ্ভৱতী।
বিলকিছ বানো ধৰ্ষণ গোচৰত ২০০৮ চনত দোষী সাব্যস্ত হোৱা ১১ গৰাকী অভিযুক্তক আজীৱন কাৰাদণ্ডৰে দণ্ডিত কৰা হৈছিল যদিও যোৱা মাহত গুজৰাটৰ ৰেহাই নীতিৰ অধীনত আটাইকেইগৰাকী ধৰ্ষণকাৰীকে মুক্তি দিয়া হৈছিল।
গুজৰাট চৰকাৰৰ এই সিদ্ধান্তৰ বিৰুদ্ধে দেশজুৰি তীব্ৰ প্ৰতিক্ৰিয়াৰ সৃষ্টি হৈছিল। তাৰ পিছতেই শীৰ্ষ আদালতৰ দ্বাৰস্থ হৈছিল কেইবাগৰাকীও মহিলা কৰ্মী।
মানৱ অধিকাৰ কৰ্মী আৰু ইতিহাসবিদসহ ৬,০০০ ৰো অধিক লোকে উচ্চতম ন্যায়ালয়ক গোচৰটোৰ দোষীসকলৰ তাৎক্ষণিকভাৱে মুক্তি প্ৰত্যাহাৰ কৰিবলৈ আহ্বান জনাই পত্ৰ প্ৰেৰণ কৰিছিল।
