শান্তিপূৰ্ণ ভাৱে সম্পন্ন হ’ল দ্বাদশ উত্তৰ কাছাৰ পাৰ্বত্য স্বায়ত্ত শাসিত পৰিষদৰ ভোটগ্ৰহণ। ১৯ জানুৱাৰি শনিবাৰে ৰাতিপুৱা ৭ বজাৰ পৰা আৰম্ভ হোৱা ভোটগ্ৰহণ বিয়লি ৩ বজাত অন্ত পৰে। এইবাৰৰ নিৰ্বাচনত অভিলেখ সংখ্যক মুঠ ৮৯.৬০ শতাংশ ভোটদান সাব্যস্ত হয়।
উল্লেখ্য যে জিলাখনৰ মুঠ ২৮০ টা ভোট কেন্দ্ৰত অনুষ্ঠিত হোৱা ভোটগ্ৰহণত ১,২২,৩৪১ গৰাকী ভোটাৰে ১২৯ গৰাকী প্ৰাৰ্থীৰ ভাগ্য বেলট বাকচত বন্দি কৰে। ২৮০টা কেন্দ্ৰৰ ভিতৰত ৮৬টা আছিল অতিস্পৰ্শকাতৰ, ১০৩ টা আছিল স্পৰ্শকাতৰ আনহাতে ৯৩টা কেন্দ্ৰ আছিল তুলনামূলকভাৱে সুৰক্ষিত।
সামগ্ৰিকভাৱে শনিবাৰে অনুষ্ঠিত হৈ যোৱা নিৰ্বাচন শান্তিপূৰ্ণ আছিল যদিও দুই এটা ভোটকেন্দ্ৰত সামান্য পৰিমানে বিসংগতি হোৱা বুলি খবৰ লাভ কৰা গৈছে। ইয়াৰ ভিতৰত জাতিংগাৰ এটা ভোট কেন্দ্ৰ আৰু মাহুৰতো ভোটক লৈ খেলিমেলিৰ অভিযোগ উত্থাপিত হৈছে। আনহাতে হাতিখালীত ভোট গ্ৰহণ সম্পন্ন হোৱাৰ পাছত বাকচ চিল নোহোৱা কাৰণে নিৰ্দলীয় প্ৰাৰ্থী বিমল হোজাইৰ সমৰ্থকে কিছু হুলস্থুলৰ পৰিৱেশ সৃষ্টি কৰে।
অৱশ্যে বাকচবন্দি ১২৯ গৰাকীৰ ভিতৰত কোন ২৮ গৰাকী প্ৰাৰ্থীৰ ভাগ্য উদয় হ’ব সেয়া অহা ২২ জানুৱাৰি অৰ্থাৎ মঙলবাৰেহে জনা যাব। কিয়নো মঙলবাৰে ৰাতিপুৱা ৮ বজাৰ পৰা হ’ব ভোটগণনা।
এইবাৰৰ নিৰ্বাচনত উল্লেখযোগ্য প্ৰাৰ্থীৰ ভিতৰত আছে প্ৰাক্তন সাংসদ তথা অগপ প্ৰাৰ্থী প্ৰকান্ত ৱাৰিচা, বৰ্তমান চি ই এম তথা বিজেপি প্ৰাৰ্থী দেবলাল গাৰ্লচা, প্ৰাক্তন বিধায়ক তথা এন পি পি দলৰ প্ৰাৰ্থী সমৰজিত হাফলংবাৰ, পৰিষদৰ বৰ্তমান অধ্যক্ষা তথা বিজেপি প্ৰাৰ্থী ৰাণু লাঙঠাচা, প্ৰাক্তন ডিএইচ্ছ ডি প্ৰধান তথা কংগ্ৰেছ প্ৰাৰ্থী দিলীপ নুনিচা, প্ৰাক্তন চি ই এম তথা কংগ্ৰেছ প্ৰাৰ্থী দেপ’লাল হোজাই, জিলা কংগ্ৰেছ সভাপতি নিৰ্মল লাঙঠাচা, বিজেপি জিলা সভাপতি নিপোলাল হোজাই আদি।
উল্লেখ্য যে জিলাখনত শান্তিপূৰ্ণভাৱে ভোটগ্ৰহণ অনুষ্ঠিত হৈ যোৱা বাবে জিলা ৰিটাৰ্নিং অফিচাৰ তথা জিলা উপায়ুক্ত অমিতাভ ৰাজখোৱাই ভোট কৰ্মী সকলৰ লগতে সৰ্বসাধাৰণ ৰাইজক ধন্যবাদ জ্ঞাপন কৰে।
