অসমৰ খাদ্য অসামৰিক যোগান আৰু গ্ৰাহক পৰিক্ৰমা বিভাগে গুৱাহাটী মহানগৰীৰ সাতটা স্থানত শাক-পাচলি বিক্ৰীৰ ব্যৱস্থা কৰিছে।
গুৱাহাটীৰ ছয়মাইল, উলুবাৰী, গণেশগুৰি, ফাঁচী বজাৰ, নাৰেংগী, শিলপুখুৰী আৰু মালিগাঁৱত বিভাগে শাক-পাচলি বিক্ৰীৰ ব্যৱস্থা কৰিছে।
২৭ মাৰ্চ শুকুৰবাৰৰ পৰা গুৱাহাটীৰ এই সাতটা স্থানত গাড়ীত আনি শাক-পাচলি গ্ৰাহকক যোগান ধৰা হ’ব।
লকডাউনৰ পৰিপ্ৰেক্ষিতত গুৱাহাটীত শাক-পাচলিৰ নাটনি হোৱালৈ লক্ষ্য ৰাখি বিভাগে এই পদক্ষেপ গ্ৰহণ কৰিছে।
জাননীত উল্লেখ থকা নম্বৰৰ গাড়ীসমূহে নিৰ্দিষ্ট স্থানসমূহত শাক-পাচলিৰ যোগান ধৰিব৷
অসমত এতিয়ালৈকে কোনো কৰ’নাভাইৰাছ আক্ৰান্ত চিনাক্ত হোৱা নাই যদিও দেশত এই সংখ্যাই ৬০০ৰ সীমা অতিক্ৰম কৰিছে।
প্ৰধান মন্ত্ৰী নৰেন্দ্ৰ মোদীয়ে ইতিমধ্যে কৰ’নাভাইৰাছ প্ৰতিহত কৰাৰ বাবে সমগ্ৰ দেশত ২১ দিনৰ লকডাউন ঘোষণা কৰিছে।
প্ৰধান মন্ত্ৰীয়ে দেশৰ প্ৰত্যেকজন লোককে মহামাৰীবিধক গুৰুত্বসহকাৰে লৈ ঘৰতে থাকিবলৈ আহ্বান জনাইছে।
