সমগ্ৰ বিশ্বতে ক’ৰ’না ভাইৰাছে বৰ্তমান সময়ত ভয়াবহ ৰূপ ধাৰণ কৰিছে।
ইটালী, চীন, স্পেইন, আমেৰিকা আদিৰ দৰে দেশৰ পাছত শেহতীয়াভাৱে ভাৰতো ক’ৰ’না ভাইৰাছৰ গুৰুতৰ সংক্ৰমণৰ কৱলত পৰিছে।
ক’ৰ’না ভাইৰাছত আক্ৰান্ত হোৱা লোকৰ সংখ্যাই বৰ্তমান সময়ত ১৪০০ অধিক হৈছে আৰু ৪০ গৰাকী লোক এই ভাইৰাছৰ সংক্ৰমণৰ ফলত মৃত্যু মুখত পৰিছে।
ক’ৰ’না ভাইৰাছৰ সংক্ৰমণ ৰোধ কৰাৰ বাবে প্ৰধান মন্ত্ৰী নৰেন্দ্ৰ মোদীয়ে ২১ মাৰ্চত সমগ্ৰ দেশত ২১ দিনীয়া ল’কডাউন ঘোষণা কৰিছিল।
এই ল’কডাউনৰ সুপ্ৰভাৱ প্ৰত্যক্ষৰূপত প্ৰকৃতিৰ ওপৰত পৰিছে। দীঘলীয়া প্ৰদূষণৰ পাছত ক্ৰমাৎ যেন প্ৰকৃতিয়ে উশাহ ল’বলৈ সময় লাভ কৰিছে।
ল’কডাইনৰ ফলত দেশৰ বিভিন্ন প্ৰান্তৰ লগতে গুৱাহাটী মহানগীৰতো এক শান্ত পৰিবেশে বিৰাজ কৰিছে।
গুৱাহাটী মহানগৰীৰ দীঘলী পুখুৰীত জনসমাগম হ্ৰাস পোৱা বাবে বিভিন্ন চৰাই-চিৰিকতিৰে ভৰি পৰিছে ঐতিহাসিক পুখুৰীটো।
জাকে জাকে বিভিন্ন পৰিভ্ৰমী চৰাইৰে বৰ্তমান ভৰি পৰিছে দীঘলীপুখুৰীৰ চৌপাশ।
মানুহেৰে ভৰি থকা দীঘলীপুখুৰী হাজাৰ হাজাৰ শৰালি হাঁহেৰে ভৰি থকাৰ লগতে ইয়াৰ চৌপাশে থকা গছ-গছনিবোৰো কুলি-কেতেকীৰে ভৰি পৰিছে।
ক’ৰ’না ভাইৰাছৰ সংক্ৰমণৰ বাবে এইবাৰ অসমীয়া লোকে বহাগ বিহু উদযাপনৰ পৰা বঞ্চিত হ’বলগীয়া হ’ব লগা হলেও অসমৰ প্ৰকৃতিয়ে এইবাৰ কিন্তু সম্পূৰ্ণ স্বাধীন আৰু নিজস্ব ৰসেৰে বহাগ বিহুক আদৰিব।
