সমগ্ৰ বিশ্বৰ লগতে এতিয়া অসমতো ক’ৰ’না ভাইৰাছৰ আতংকই বিৰাজ কৰিছে।
দিল্লীৰ নিজামুদ্দিন মাৰ্কাজৰ জামাতৰ পৰা অসমত প্ৰৱেশ কৰা ১৬ জন ব্যক্তিৰ শৰীৰত ক’ৰ’না ভাইৰাছৰ উপস্থিতি ধৰা পৰিছে।
আটাইকেইগৰাকী ব্যক্তিক চিকিৎসালয়ত ৰখাৰ লগতে তেওঁলোকৰ সংস্পৰ্শলৈ অহা আৰু দিল্লীৰ নিজামুদ্দিন মাৰ্কাজলৈ যোৱা বহু ব্যক্তিক জিলাই জিলাই কোৱাৰেণ্টাইনত ৰখা হৈছে।
শিৱসাগৰৰ ক’ৰ’না ভাইৰাছত আক্ৰান্ত বুলি সন্দেহ কৰা প্ৰায় ১,২১৫ গৰাকী ব্যক্তিক কোৱাৰেণ্টাইনত ৰখা হৈছে।
শিৱসাগৰবাসীৰ বাবে বৰ্তমান ভাল খবৰটো হল, শিৱসাগৰৰ কোৱাৰেণ্টাইনত থকা ৫৫ জন ব্যক্তিৰ তেজৰ নমুনা সংগ্ৰহ কৰি পৰীক্ষাৰ বাবে ডিব্ৰুগড়ৰ লাহোৱালৰ পৰীক্ষাগাৰলৈ লৈ পঠোৱা হৈছিল আৰু আজি আবেলি লাভ কৰা পৰীক্ষাৰ ফলাফল অনুসৰি ৫৫ জন ব্যক্তিৰ ভিতৰত এজনৰো দেহত কভিড-১৯-ৰ উপস্থিতি ধৰা পৰা নাই।
এই ৫৫ গৰাকী ব্যক্তিৰ ভিতৰত বুধবাৰে শিৱসাগৰ অসামৰিক চিকিৎসালয়ৰ আইচ’লেশ্যন কক্ষৰ পৰা পলায়ন কৰা ব্যক্তি গৰাকীৰ লগতে নিজামুদ্দিনৰ মাৰ্কাজৰ লগত জড়িত আঠ গৰাকী ব্যক্তিও আছে বুলি জানিব পৰা গৈছে।
শিৱসাগৰ জিলা প্ৰশাসনে জিলাখনত কৰোনাভাইৰাছ সংক্ৰমণ ৰোধৰ বাবে বিভিন্ন কাৰ্য ব্যৱস্থা হাতত লৈছে যদিও জনসাধাৰণক সজাগ আৰু সচেতন হৈ থাকিবলৈ অনুৰোধ জনাইছে। লকডাউনৰ সময়ত চৰকাৰে বান্ধি দিয়া নিয়ম নীতি মানি চলি জিলা প্ৰশাসনক সহযোগ কৰিবলৈ আহ্বান জনায়।
