কৰ’না ভাইৰাছৰ ভেকচিন (টীকা)ক লৈ সমগ্ৰ বিশ্বতে গৱেষণা চলি আছে। বেলেগ বেলেগ দেশে তেওঁলোকৰ দেশসমূহত ভেকচিন তৈয়াৰ কৰি থকাৰ দাবী কৰিছে।
ইয়াৰ মাজতে আমেৰিকাৰ বিজ্ঞানীয়ে দাবী কৰিছে যে তেওঁলোকৰ ভেকচিনে এনে পৰ্যায়ত উপনীত হৈছে যাৰ দ্বাৰা কৰ’না ভাইৰাছৰ সংক্ৰমণ শক্তিশালীভাৱে প্ৰতিৰোধ কৰিব পৰা যাব।
সমগ্ৰ বিশ্বতে কৰ’না ভাইৰাছ মহামাৰীয়ে এতিয়ালৈকে ৫০ হাজাৰতকৈয়ো অধিক লোকৰ প্ৰাণ লোৱাৰ লগতে ১০ লাখতকৈয়ো অধিক লোকক আক্ৰান্ত কৰিছে।
য়ুনিভাৰ্ছিটি অফ পিটছ্বাৰ্গ স্কুল অফ মেডিচিনৰ বিজ্ঞানীসকলে দাবী কৰিছে যে তেওঁলোকে বাকী দেশৰ তুলনাত কম সময়তে COVID-19 কৰ’না ভাইৰাছৰ ভেকচিন প্ৰস্তুত কৰি উলিয়াইছে।
য়ুনিভাৰ্ছিটিখনৰ বিজ্ঞানীসকলে যি ভেকচিন তৈয়াৰ কৰিছে তাৰ বাবে তেওঁলোকে ছাৰ্ছ (SARS) আৰু মাৰ্ছ (MERS)ক আধাৰ হিচাপে লৈছে।
পিটছ্বাৰ্গ স্কুল অফ মেডিচিনৰ সহযোগী অধ্যাপক আন্দ্ৰিয়া গমবোট্টোই জানিবলৈ দিয়া মতে ছাৰ্ছ আৰু মাৰ্ছৰ ভাইৰাছ নতুন কৰ’না ভাইৰাছ অৰ্থাৎ COVID-19ৰ সৈতে বহুখিনি মিলে। ইয়াৰ দ্বাৰা বুজিব পৰা গৈছে যে তিনিওটাৰে স্পাইক প্ৰ’টিন (ভাইৰাছৰ বাহিৰৰ তৰপ) ভেদ কৰাটো বহুত প্ৰয়োজনীয় যাতে এই ভাইৰাছৰ পৰা মানুহে মুক্তি পায়।
অধ্যাপক আন্দ্ৰিয়াই কয় যে আমি ভাইৰাছটো কেনেকৈ মাৰিব লাগে, ইয়াক কেনেকৈ পৰাজিত কৰিব লাগে সেয়া বিচাৰি পাইছো। আমি আমাৰ বেকচিনটো নিগনিৰ ওপৰত প্ৰয়োগ কৰি চাইছো। ইয়াৰ ফলাফল বহুত ইতিবাচক।
অধ্যাপকগৰাকীয়ে কয় যে এই ভেকচিনৰ নাম আমি পিটগোৱেক(PittGoVacc) ৰাখিছো। ভেকচিনটোৰ প্ৰয়োগৰ ফলত নিগনিৰ শৰীৰত এনেকুৱা এন্টিবডিজ উৎপন্ন হয় যি কৰ’না ভাইৰাছ প্ৰতিৰোধ কৰাত সক্ষম।
অধ্যাপক গমবোট্টোই জানিবলৈ দিয়ে যে COVID-19 কৰ’না ভাইৰাছ প্ৰতিৰোধ কৰিবলৈ যিমান এন্টিবডিজৰ শৰীৰত প্ৰয়োজন হয়, সিমান পিটগোৱেক ভেকচিনে পূৰণ কৰিব পাৰে। অতি শীঘ্ৰে ইয়াক মানুহৰ শৰীৰত পৰীক্ষা কৰি চোৱা হ’ব।
পিটছ্বাৰ্গ স্কুল অফ মেডিচিনৰ দলটোৱে অহা কেইমাহৰ ভিতৰতে এই বেকচিন মানুহৰ শৰীৰত পৰীক্ষা কৰা আৰম্ভ কৰিব।
দলটোৱে জানিবলৈ দিয়ে যে তেওঁলোকে যোৱা বছৰ মাৰ্ছ(NERS) ভাইৰাছৰ বাবে বনোৱা ভেকচিন বহুত সফল হৈছিল।
