প্ৰধান মন্ত্ৰী নৰেন্দ্ৰ মোদীয়ে দেশত ক’ৰ’না ভাইৰাছৰ সংক্ৰমণৰ প্ৰতি লক্ষ্য ৰাখি ঘোষণা কৰা ২১ দিনীয়া ল’কডাউনৰ ফলত দেশত প্ৰতিদিনে ৪.৬৪ বিলিয়ন আমেৰিকান ডলাৰ ক্ষতি হৈছে।
২১ দিনীয়া ল’কডাউনৰ ফলত ভাৰতে প্ৰায় ৯৮ বিলিয়ন আমেৰিকান ডলাৰৰ আৰ্থিক ক্ষতিৰ সন্মুখিন হ’ব বুলি একিউট ৰেটিংছ এণ্ড ৰিচাৰ্ছ লিমিটেডে বৃহস্পতিবাৰে প্ৰকাশ কৰিছে।
উল্লেখযোগ্য যে, সমগ্ৰ দেশত ল’কডাউন ঘোষণা কৰাৰ ফলত সকলো ব্যৱসায়-বাণিজ্য বন্ধ হৈ পৰাৰ লগতে, বিমান সেৱা, ৰে’ল সেৱাকে ধৰি সকলো ধৰণৰ যাতায়ত ব্যৱস্থা স্তব্ধ হৈ পৰিছে।
সমগ্ৰ বিশ্বত ক’ৰ’না ভাইৰাছৰ ভয়াবহ সংক্ৰমণৰ বাবে একমাত্ৰ ভাৰতে নহয় সমগ্ৰ বিশ্ব অৰ্থনীতিত ইয়াৰ বেয়া প্ৰভাৱ পৰিব।
আনহাতে, ১৫ এপ্ৰিলৰ পৰা ল’কডাউনৰ শেষ হ’ব যদিও চৰকাৰে ক’ৰ’নাৰ সংক্ৰমণৰ প্ৰতি লক্ষ্য ৰাখি বিভিন্ন ধৰণৰ নীতি-নিৰ্দেশনা বাহাল ৰখাৰ সম্ভাৱনা আছে।
আন্তঃৰাষ্ট্ৰীয় মুদ্ৰা নিধিয়ে ক’ৰ’না ভাইৰাছৰ বাবে সমগ্ৰ বিশ্ব অৰ্থনৈতিক মন্দাৰ সন্মুখিন হ’বলগীয়া হ’ব বুলি ভৱিষ্যত বাণী কৰিছে।
ক’ৰ’নাৰ প্ৰভাৱৰ বাবে ২০২০-২০২১ বিত্তীয় বৰ্ষত ভাৰতৰ জিডিপিৰ হাৰ ২-৩ শতাংশলৈ অৱনমিত হ’ব বুলিও একিউট ৰেটিংছ এণ্ড ৰিচাৰ্ছ লিমিটেডে মত প্ৰকাশ কৰিছে।