কৰ’না ভাইৰাছৰ সংক্ৰমণৰ আতংকত দেশজুৰি অব্যাহত আছে স্বাস্থ্যজনিত জৰুৰীকালীন অৱস্থা। ইয়াৰ মাজতে ভাৰতীয় কোম্পানীসমূহৰ পৰিচালনাৰ নিয়ন্ত্ৰণৰ দায়িত্ব যাতে কোনো চুবুৰীয়া দেশৰ হাতলৈ গুচি নাযায় সেয়া নিশ্চিত কৰিবৰ বাবে পদক্ষেপ গ্ৰহণ কৰিছে কেন্দ্ৰীয় চৰকাৰে।
কেন্দ্ৰীয় চৰকাৰে সেয়েহে প্ৰত্যক্ষ বিদেশী বিনিয়োগ নীতি (FDI)ত সালসনি ঘটাইছে। নতুন এই সালসলনি নীতিৰ আওতালৈ আন চুবুৰীয়া দেশৰ লগতে চীনো পৰিব।
শনিবাৰে কেন্দ্ৰীয় উদ্যোগ আৰু বাণিজ্য মন্ত্ৰ্যালয়ৰ পৰা এই সন্দৰ্ভত নিৰ্দেশনা জাৰি কৰা হৈছে।
কেন্দ্ৰীয় উদ্যোগ আৰু বাণিজ্য মন্ত্ৰ্যালয়ৰ অধীনৰ ডিপাৰ্টমেন্ট অফ ইণ্ডাষ্ট্ৰি এণ্ড ইন্টাৰনেল ট্ৰেড (DPIIT)ৰ ফালৰ পৰা কালি এখন প্ৰেছ বিজ্ঞপ্তি জাৰি কৰা হয়।
বিজ্ঞপ্তিখনত কোৱা হৈছে যে ভাৰতৰ সীমান্তত অৱস্থিতি এনে কোনো দেশৰ পৰা আৰু প্ৰত্যক্ষভাৱে এইদেশত বিনিয়োগ কৰিব পৰা নাযাব। এই৭এত্ৰত আগতীয়াকৈ চৰকাৰৰ অনুমতি ল’ব লাগিব।
ভাৰতত প্ৰত্যক্ষ বিদেশী বিনিয়োগৰ ক্ষেত্ৰত বিদেশী বিনিয়োগকাৰীৰ বাবে দুটা পথ খোলা আছে। প্ৰথমতে বিনিয়োগ কৰিবলৈ ইচ্ছুক বিদেশী সংস্থাসমূহে বিনিয়োগৰ ক্ষেত্ৰত দিল্লীৰ অনুমতি ল’ব লাগিব।
আনহাতে, যিকোনো ভাৰতীয় সংস্থাত বিনিয়োগৰ পূৰ্বে কেন্দ্ৰীয়চৰকাৰৰ অনুমতিৰ প্ৰয়োজন। এইবাৰৰ পৰা ভাৰতৰ সীমান্তৰ চুবুৰীয়া দেশৰ কোনো সংস্থাই ভাৰতত বিনিয়োগৰ বাবে প্ৰথমতেই চৰকাৰৰ অনুমতি লোৱাৰ প্ৰয়োজন হ’ব।
কিন্তু কেবল মাত্ৰ ভাৰতৰ সীমান্তৰ সৈতে সংলগ্ন চুবুৰীয়া দেশসমূহৰ বাবে এই নীতি আৰম্ভ কৰা হ’ল?
বিশ্লেষকসকলৰ মতে চীনৰ সংস্থাসমূহৰ আগ্ৰাসন ৰোধ কৰিবলৈকে কেন্দ্ৰীয় চৰকাৰে এইদৰে প্ৰত্যক্ষ বিদেশী বিনিয়োগ নীতিৰ সালসলনি ঘটাইছে। তেওঁলোকে ক’ব খোজে যে বৰ্তমান বিশ্বৰ বিভিন্ন দেশত চীনৰ সংস্থাসমূহে বিশাল পৰিমানৰ পুঁজি বিনিয়োগ কৰিছে। আনকি বিভিন্ন সংস্থাৰ পৰিচালনাৰ দায়িত্বও দখল কৰিবলৈ আগবাঢ়িছে চীনৰ সংস্থাই।
ভাৰতীয় সংস্থাসমূহৰ ওপৰতো যে চীনৰ দৃষ্টি আছে তেনে এক ঘটনা শেহতীয়াকৈ পোহৰলৈ আহিছে।ভাৰতৰ আগশাৰীৰ গৃহঋণ প্ৰদানকাৰী সংস্থা এইচ ডি এফ চিৰ ১.৭৫কোটি শ্বেয়াৰ চীনৰ পিপল’ছ বেংক অফ চাইনাই ক্ৰয় কৰিছে।
যোৱা জানুৱাৰিৰ পৰা মাৰ্চৰ ভিতৰৰ সময়ছোৱাতে এই লেনদেন সংঘটিত হোৱা বুলি অনুমান কৰা হৈছে। এইচ ডি এফ চি য়ে নিয়ম অনুসৰি বিষয়টো ষ্টক এক্সচেঞ্জক নজনোৱা হ’লে হয়তো সেয়া অন্ধাকাৰতে থাকিলেহেঁতেন।
উক্ত বিষয়টোক লৈ যোৱা সপ্তাহত ৰাহুল গান্ধী সৰৱ হৈ পৰিছিল। নতুন নাতি অনুসৰি এতিয়াৰে পৰা চীনৰ প্ৰতিটো বিনিয়োগৰ প্ৰস্তাৱ সুক্ষ্মভাৱে নিৰীক্ষণ কৰি অনুমতিৰ সিদ্ধান্ত ল’ব। চৰকাৰৰ অনুমতি পালেহে তেওঁলোকে বিনিয়োগ কৰিব পাৰিব।
