মঙ্গলবাৰে খানাপাৰাস্থিত অসম প্ৰশাসনীয় পদাধিকাৰী মহাবিদ্যালয়ত অসমৰ মুঠ ৩৫ গৰাকী অৰ্থনীতিবিদৰ সৈতে এক আলোচনাত মিলিত হয় ৰাজ্যৰ মুখ্যমন্ত্ৰী সৰ্বানন্দ সোণোৱাল, স্বাস্থ্য মন্ত্ৰী ড০ হিমন্ত বিশ্ব শৰ্মা কৃষি মন্ত্ৰী অতুল বৰা, পৰিবহন মন্ত্ৰী চন্দ্ৰমোহন পাটোৱাৰী আৰু সমাজ কল্যাণ বিভাগৰ মন্ত্ৰী প্ৰমিলা ৰাণী ব্ৰহ্ম।
আজিৰ এই আলোচনাত অৰ্থনীতিবিদসকলৰ পৰা পৰামৰ্শ গ্ৰহণ কৰে ৰাজ্য চৰকাৰৰ মন্ত্ৰীসকলে।
এই আলোচনাৰ পাছতে সৰ্বানন্দ সোণোৱালৰ সংবাদমাধ্যমৰ আগত মন্তব্য, ‘আমি আমাৰ অৰ্থনৈতিক ব্যৱস্থা টনকিয়াল কৰিব পাৰিম।আমি স্বাৱলম্বী হ’ব পাৰিম, আমাৰ যুৱ প্ৰজন্মৰ মাজত দৃঢ়তা আৰু সংকল্প আছে। আমাৰ জলবায়ু, মাটিৰ উৰ্বৰতা আছে।আমি এই আটাইবোৰৰ সদব্যৱহাৰ কৰিব লাগিব।‘
ইপিনে, ৰাজ্যৰ ৩৫ গৰাকীকৈ অৰ্থনীতিবিদে কি পৰামৰ্শ আগবঢ়ালে সেই সন্দৰ্ভত সদৰী কৰি মুখ্য মন্ত্ৰীগৰাকীয়ে কয়, ‘ক’ৰ’না ভাইৰাছৰ এই পৰিস্থিতিৰ মাজত সামাজিক দুৰত্ব বৰ্তাই ৰাখি বিভিন্ন অৰ্থনৈতিক উন্নয়নমূলক কাম-কাজ আৰম্ভ হ’ব লাগে বুলি অৰ্থনীতিবিদসকলে পৰামৰ্শ আগবঢ়াইছে। ইতিমধ্যে কৃষিখণ্ডৰ কাম আৰম্ভ হৈছে। গ্ৰীণ জ’নসমূহত ইতিমধ্য দোকানসমূহ খুলি দিয়া হৈছে। পৰ্য্যায়ক্ৰমে এই পৰিস্থিতিৰ লগত মোকাবিলা কৰিবৰ কাৰণে অসমৰ ৰাইজৰ সহযোগত কেনেদৰে আগবাঢ়িব পাৰি সেই সন্দৰ্ভতো তেওঁলোকে গুৰুত্বপূৰ্ণ পৰামৰ্শ প্ৰদান কৰিছে।‘
তেওঁ আৰু কয়, ‘উঠি অহা প্ৰজন্মক মৰ্যাদা সহকাৰে কৰ্ম সংস্থাপন দি তথা ৩ কোটি ৩০ লাখ লোকক মৰ্যাদাসহকাৰে আগুৱাই নিব পাৰো, ইয়াৰ প্ৰতি লক্ষ্য ৰাখি ৰাজ্য চৰকাৰে আজি অৰ্থনীতিবিদসকলে আগবঢ়োৱা পৰামৰ্শত গুৰুত্ব প্ৰদান কৰি তেওঁলোকৰ পৰামৰ্শৰ ভিত্তিত পৰিকল্পনা হাতত লৈ আগন্তুক দিনত অসমক আগুৱাই নিব লাগিব।’
ইয়াৰোপৰি, অৰ্থনীতিবিদসকলে ব্লক পৰ্য্যায়লৈকে টাক্স ফৰ্চ গঠনৰ কথা কৈছে বুলি সদৰী কৰি তেওঁ লগতে কয়, ‘তেওঁলোকে ১০০ দিনীয়া কৰ্ম সংস্কৃতি লোৱাৰ কথা কৈছে। কৃষি খণ্ড, উদ্যান শস্যত বিশেষভাৱে আত্মনিয়োগ কৰাৰ কথা তেওঁলোকে কৈছে। ইয়াৰোপৰি অসমৰ দক্ষতাসম্পন্ন যুৱকক বিভিন্ন ক্ষেত্ৰত নিয়োগ কৰাৰ বাবে তেওঁলোকে পৰামৰ্শ দিছে।’
‘উৎপাদন শক্তি বঢ়াই স্বাৱলম্বী হৈ অৰ্থনীতিৰ বুনিয়াদ শক্তিশালী ৰূপত গঢ় দিয়াৰ বাবে তেওঁলোকে পৰামৰ্শ দিছে। ৰাজ্য চৰকাৰখনে ৰাজহ ভঁৰালৰ ধন ব্যয় কৰাৰ প্ৰয়োজনীয়তা আছে তেনে চেক্টৰত বিশেষভাৱে গুৰুত্ব আৰোপ কৰিবলৈ তেওঁলোকে কৈছে।‘
সামগ্ৰিকভাৱে বৰ্তমানৰ অৰ্থনীতিত মোকাবিলা কৰিবৰ বাবে ৰাজ্য চৰকাৰক যিখিনি পৰামৰ্শ দিছে তাৰ বাবে সোণোৱালে অৰ্থনীতিবিদসকলক কৃতজ্ঞতা জ্ঞাপন কৰে।
