অৰণাচল প্ৰদেশৰ চৰকাৰে ৰাজ্যখনৰ উন্নয়নৰ বাবে বিভিন্ন উল্লেখণীয় পদক্ষেপ গ্ৰহণ কৰিছে। যাৰ ফলত অনাগত দিনত ৰাজ্যখনে এটা অন্য ধৰণৰ গতি লাভ কৰিব। লগতে দেশৰ অন্য অঞ্চল সমূহতকৈ অৰুণাচল প্ৰদেশখন উন্নতমানৰ পৰ্যটনস্থলী হিচাপে পৰিগণিত হ’ব। মঙলবাৰে অৰুণাচলৰ ৰাজ্যিক মুখপাত্ৰই এনেদৰে কোৱা দেখা যায়।
ৰাজ্য চৰকাৰে ইতিমধ্যে এই ক্ষেত্ৰত উল্লেখনীয় পদক্ষেপ গ্ৰহণ কৰিছে। চৰকাৰখনে আৰম্ভ কৰা ডিজিটেল অৰুণাচল মিছনৰ বাবে ইতিমধ্যে কেন্দ্ৰৰ পৰা ১৭ হেজাৰ ৪৯ কোটি টকা অনুমোদন লাভ কৰিছে।
অৰুণাচল চৰকাৰৰ মুখ্য সচিব সত্য গোপালে কয় যে ৰাজ্যত অতি শীঘ্ৰে নিৰ্দিষ্ট উইং এয়াৰক্ৰাফ্ট সেৱা আৰম্ভ হ’ব। এই এয়াৰক্ৰাফ্ট সেৱা পাচীঘাটৰ পৰা তেজুলৈ পৰিচালিত হ’ব।
অৰুণাচল প্ৰদেশৰ ৩২ সংখ্যক ৰাজ্যিক দিৱসৰ এক অনুষ্ঠানত উপস্থিত থাকি গোপালে আৰু কয় যে ৰাজ্যখনত দুৰ্নীতি সম্পূৰ্ণকৈ নিৰ্মূল কৰাৰ বাবে চৰকাৰ বদ্ধপৰিকৰ।
এই সম্পৰ্কত তেওঁ আৰু কয় যে ৰাজ্য চৰকাৰে বহু কোটিটকীয়া ৰাজহুৱা বিতৰণ প্ৰণালী দুৰ্নীতিৰ তদন্ত ইতিমধ্যে যোৱা বছৰে চিবিআইক অৰ্পণ কৰা হৈছে।
‘ৰাজ্যৰ আইন-শৃংখলা ব্যৱস্থাৰ উন্নয়ন ঘটোৱাৰ বাবে চৰকাৰে বিভিন্ন ব্যৱস্থা গ্ৰহণ কৰিছে। আৰু ৰাজ্যিক শিক্ষা বিভাগত অবৈধভাবে নিযুক্তি লাভ কৰা সকলো লোকৰে নিযুক্তিপত্ৰ বাতিল কৰা হৈছে’, এই কথা জানিবলৈ দিয়ে মুখ্য সচিবজনে।
উল্লেখ্য যে কেন্দ্ৰীয় চৰকাৰে ৰাজ্যখনত এটা উপজাতীয় গৱেষণা প্ৰতিষ্ঠান আৰু দুটা জলবিদ্যু প্ৰকল্প স্থাপনৰ বাবে ২৮ কোটি টকা মুকলি কৰি দিয়া বুলি জানিব দিয়ে।
এই অনুষ্ঠানতে মুখ্য সচিবজনে অৰুণাচলৰ ইটানগৰ আৰু পাচীঘাট চহৰক স্মাৰ্ট চিটি তালিকাত অন্তৰ্ভুক্তি কৰাৰ বাবে বিজেপি নেতৃত্বাধীন কেন্দ্ৰীয় চৰকাৰখনক ধন্যবাদ জনায়।
