ৰাজ্যিক বিত্ত মন্ত্ৰী হিমন্ত বিশ্ব শৰ্মাই জনতা ভৱনত আয়োজিত এখন সংবাদমেলত ক’ৰ’নাৰ ভয়াবহ সংক্ৰমণৰ সময়ত মুকলি কৰি দিয়া বৃহৎ অৰ্থনৈতিক পেকেজৰ বাবে কেন্দ্ৰ চৰকাৰক ধন্যবাদ জ্ঞাপন কৰে।
সংবাদমেলত মন্ত্ৰী গৰাকীয়ে কেন্দ্ৰ চৰকাৰে মুকলি কৰি দিয়া টকাৰ সহায়ত ৰাজ্যৰ জনসাধাৰণে বিজুলীৰ পোহৰ লাভ কৰিবলৈ সক্ষম হৈছে বুলি কয়।
ল’কডাউনৰ বাবে ৰাজ্যৰ প্ৰায়বোৰ বিদ্যুৎ উপভোক্তাই বিজুলী বিল আদায় নিদিয়াৰ বাবে অসম ৰাজ্যিক বিদ্যুৎ পৰিষদে বিদ্যুৎ যোগান ধৰা কোম্পানী বোৰক আদায় দিব লগা টকাৰ অভাৱত ভূগিছিল বুলি সংবাদমেলত মন্ত্ৰী শৰ্মাই কয়।
কিন্তু কেন্দ্ৰ চৰকাৰে ঘোষণা কৰা অৰ্থনৈতিক পেকেজৰ সহায়ত এতিয়া বিদ্যুৎ পৰিষদে কোম্পানীবোৰক দিবলগীয়া টকা আদায় দিবলৈ সক্ষম হোৱাৰ লগতে ৰাজ্যত বিদ্যুৎ যোগান অব্যাহত ৰাখিবলৈ সক্ষম হ’ব বুলিও তেওঁ লগতে কয়।
‘‘মোদী চৰকাৰে সহায় নকৰিলে অসমৰ জনসাধাৰণ আন্ধাৰত থাকিবলগীয়া হ’লহেতেন। উপভোক্তা সকলে বিগত দুমাহ বিজুলী মাচুল আদায় নিদিয়া বাবে অসম ৰাজ্যিক বিদ্যুৎ পৰিষদৰ হাতত বিদ্যুৎ যোগান ধৰা কোম্পানী যেনে এন এইচ পি চি, এন টি পি চি আদিক আদায় দিবলগীয়া টকা নাছিল আৰু তেওঁলোকে টকা আদায় নিদিলে বিদ্যুৎ যোগান বন্ধ কৰিব,’’ হিমন্ত বিশ্ব শৰ্মাই সংবাদমেলত এইদৰে কয়।
‘‘বিদ্যুৎ পৰিষদক দিবলৈ আমাৰ হাততো পইচা নাছিল আৰু তেওঁলোকে পইচা নিদিলে বিদ্যুতৰ সেৱা অব্যাহত ৰাখিব নোৱাৰিলে হেতেন ফলত ৰাজ্যুজুৰি ল’ডশ্বেডিং হ’ল হেতেন। কিন্তু মোদী চৰকাৰক ধন্যবাদ তেওঁলোকে ঘোষণা কৰা পেকেজৰ সহায়ত আমি কোম্পানীবোৰক দিবলগীয়া টকা দিব পাৰিলো,’’ হিমন্ত বিশ্ব শৰ্মাই লগতে কয়।
আনহাতে,কেন্দ্ৰ চৰকাৰে নতুন কৈ নিৰ্ধাৰণ কৰা ক্ষুদ্ৰ আৰু লঘু উদ্যোগৰ সংজ্ঞাৰ ফলত অসমৰ ৬৪,০০০ উদ্যোগে কোনোধৰণৰ মদগেজ নোহোৱাকৈ বেংকৰ ঋণ লাভ কৰিবলৈ সক্ষম হ’ব বুলিও সংবাদমেলত মন্ত্ৰী গৰাকীয়ে কয়।
