উচ্চতম ন্যায়ালয়ে বৃহস্পতিবাৰে এক গোচৰৰ শুনানিত সংৰক্ষণ সম্পৰ্কে গুৰুত্বপূৰ্ণ মন্তব্য কৰিছে।
তামিলনাডুৰ NEET প’ষ্ট গ্ৰেজুৱেশ্যনত সংৰক্ষণ গোচৰত আদালতে কয় যে সংৰক্ষণ মৌলিক অধিকাৰ নহয়।
সেইদৰে আদালতে তামিলনাডুৰ কেইবাটাও ৰাজনৈতিক দলে দাখিল কৰা এখন আবেদন গ্ৰহণ কৰিবলৈ অস্বীকাৰ কৰে।
ৰাজ্যখনৰ ডিএমকে, এআইডিএমকে, চিপিআইকে ধৰি আন কেইবাটাও ৰাজনৈতিক দলে উচ্চতম ন্যায়ালয়ত NEETৰ অধীনত মেডিকেল কলেজৰ আসন সন্দৰ্ভত তামিলনাডুত ৫০শতাংশ অ’বিচিৰ সংৰক্ষণৰ বিষয়ত আবেদন দাখিল কৰিছিল।
বৃহস্পতিবাৰে উচ্চতম ন্যায়ালয়ত আবেদনৰ ওপৰত শুনানি হৈছিল।
শুনানিৰ সময়ত উচ্চতম ন্যায়ালয়ে কয় যে এই বি,য়ত কাৰ মৌলিক অধিকাৰ কৰ্তন কৰা হৈছে? আপোনালোকৰ আবেদনৰ পৰা বুজা গৈছে যে আপোনালোকে মাত্ৰ তামিলনাডুৰ কিছুমান লোকৰ ভালৰ বাবে কথা কৈছে।
জিএমকেই আদালতত কয় যে তেওঁলোকে আদালতৰ পৰা অধিক সংৰক্ষণৰ কথা কোৱা নাই, বৰঞ্চ যিখিনি আছে তাক বলবৎ কৰাবলৈহে কোৱা হৈছে।
ইয়াৰ মাজতে ন্যায়াধীশ ৰাৱে কয় যে সংৰক্ষণ কোনো মৌলিক অধিকাৰ নহয়। আপোনালোকে আবেদন প্ৰত্যাহাৰ কৰি উচ্চ ন্যায়ালয়ত দাখিল কৰক।
অৱশ্যে, উচ্চতম ন্যায়ালয়ে কয় যে এটা বিষয়ত সকলো ৰাজনৈতিক দল একেলগে অহাত আমি সুখী যদিও আমি এই আবেদনৰ শুনানি নলওঁ। আমি ইয়াক নাকচ কৰা নাই আৰু আপোনালোকক উচ্চ ন্যায়ালয়ত শুনানিৰ সুযোগ দিয়া হৈছে।
উল্লেখ্য যে ইয়াৰ পূৰ্বেও সংৰক্ষণ সম্পৰ্কত উচ্চতম ন্যায়ালয়ে এনেধৰণৰ মন্তব্য কৰি কৈছিল যে ই কোনো ধৰণৰ মৌলিক অধিকাৰ নহয়।
