গোৱালপাৰা জিলাৰ অসম-মেঘালয় সীমান্তৱৰ্তী বিভিন্ন অঞ্চলক বিগত চাৰিটা বছৰে বিজেপি চৰকাৰৰ উন্নয়নৰ শ্লোগানে চুব নোৱাৰিলে।
অঞ্চলসমূহৰ যাতায়ত ব্যৱস্থাৰ প্ৰতি লক্ষ্য কৰিলেই সেই কথা সহজে বোধগম্য হয়।
গোৱালপাৰা জিলাৰ অসম-মেঘালয় সীমান্তৱৰ্তী জিৰা-তৰেংথপ অঞ্চলৰ লোক সকলে এখন দলঙৰ বাবে বহু বছৰ অপেক্ষা কৰিবলগীয়া হৈছে।
জিৰা, তৰেংথপ, পুঠিমাৰী, খাৰদাং আদিকে ধৰি বিভিন্ন অঞ্চলৰ লোকে এখন দলঙৰ বাবে যাতায়তৰ ক্ষেত্ৰত দুৰ্ভোগ ভূগিবলগীয়া হৈছে।
প্ৰতিবাৰ নিৰ্বাচনৰ পূৰ্বে ৰাজনৈতিক নেতা সকলে দিয়া প্ৰতিশ্ৰুতিৰ বাহিৰে অঞ্চলটোৰ ৰাইজে একো লাভ কৰা নাই বুলি অভিযোগ কৰে।
শেহতীয়াকৈ জিৰা-তৰেংথপৰ ৰাইজে বিগত সময়ছোৱাত কিছু পৰিৰ্ৱতনৰ আশা কৰিছিল যদিও সেয়া সময়ত ভেকোভাওনাতে পৰিণত হ’ল।
এখন দলঙৰ অভাৱৰ বাবে বৃহত্তৰ অঞ্চলটোৰ ৰাইজে টুলুঙা নাওৰে যাতায়ত অব্যাহত ৰাখিব লগীয়া হৈছে।
টুলুঙা নাওৰ যাত্ৰা বিপদ সংকুল যদিও অন্য কোনো উপায় নথকাত অঞ্চলটোৰ ৰাইজ, ছাত্ৰ-ছাত্ৰী শিক্ষক-শিক্ষয়িত্ৰীসকলে এই টুলুঙা নাৱেৰে যাত্ৰা কৰিবলগীয়া হৈছে।
স্থানীয় ৰাইজে ২০২১ বিধানসভা নিৰ্বাচনৰ পূৰ্বে এখন দলং লাভ নকৰিলে নিৰ্বাচনত ইয়াৰ উত্তৰ দিব বুলি কয়।