ৰাজ্যৰ বিভিন্ন প্ৰান্তত এতিয়া আৰম্ভ হৈছে গণ সংক্ৰমণ। গুৱাহাটী মহানগৰীতো এতিয়া ভয়ংকৰ ৰূপত গণ সংক্ৰমণ হোৱা পৰিলক্ষিত হৈছে।
তাৰ মাজতে কামৰূপ মহানগৰ জিলাৰ অতিৰিক্ত উপায়ুক্ত চিন্ময় নাথ কোভিড-১৯ত আক্ৰান্ত হোৱাৰ খবৰ আহিছে।
কামৰূপ মহানগৰ জিলা তথ্য ও জন সংযোগৰ জন সম্পৰ্কৰক্ষী বিষয়া ৰতন সাউদে আমাৰ সাংবাদিকক এই কথা জনাইছে।
কালি নিশা তেওঁ কোভিড-১৯পজিটিভ হিচাপে চিনাক্ত হৈছিল।
তেওঁ জ্বৰ-কাহত আক্ৰান্ত হৈ আছিল বাবে যোৱা ১ জুলাইত স্বাৱ টেষ্ট কৰাইছিল।
কালি তেওঁৰ ৰিজাল্ট পজিটিভ আহে।
বৰ্তমান তেওঁ GMCH ত চিকিৎসাধীন হৈ আছে।
উল্লেখযোগ্য যে, স্বাস্থ্য মন্ত্ৰী ডঃ হিমন্ত বিশ্ব শৰ্মাৰ সৈতে কোভিডৰ বিৰুদ্ধে যুঁজখনত মহানগৰীৰ বহু ঠাইত একেলগে দেখা গৈছিল প্রশাসনিক বিষয়া চিন্ময় নাথক।
ইয়াৰোপৰি, জালুকবাৰী আৰক্ষী থানাৰ ভাৰপ্ৰাপ্ত আৰক্ষী বিষয়া উপেন কলিতা আৰু ৰাজভৱনত কৰ্মৰত দুগৰাকী লোকৰ দেহত মাৰাত্মক ক’ৰ’ণা ভাইৰাছৰ উপস্থিতি পোৱা গৈছে।
উল্লেখযোগ্য যে, গুৱাহাটীত বৰ্তমানলৈকে দুই সহস্ৰাধিক লোক ক’ৰ’ণাত আক্ৰান্ত হৈছে।
ৰাজ্যত মুঠ ৯৭৯৯ গৰাকী লোক আক্ৰান্ত হোৱাৰ বিপৰীতে ৬৩২৭ গৰাকী কোভিড মুক্ত হৈছে। বৰ্তমানলৈকে মুঠ ১৪ গৰাকী লোকে মৃত্যুক আঁকোৱালি লৈছে।
তেওঁৰ সংস্পৰ্শলৈ অহা সকলোকে স্বাৱ সংগ্ৰহ কৰা হ’ব বুলি জানিব পৰা গৈছে।
