শনিবাৰে আৰু দুজন লোকৰ মৃত্যুকে ধৰি এইবাৰৰ বানপানীত ৰাজ্যখনত মুঠ ৩৭জন লোকৰ মৃত্যু হৈছে।
অৱশ্যে, সামগ্ৰিকভাৱে সাতখন জিলাৰ বান পৰিস্থিতি বহু উন্নত হৈছে।
ৰাজ্যখনৰ ৩৩খন জিলাৰ ভিতৰত ১৮খন জিলাৰ ১১লাখ লোক বানত ক্ষতিগ্ৰস্ত হৈছে বুলি চৰকাৰী সূত্ৰই প্ৰকাশ কৰিছে।
অসম ৰাজ্যিক দুৰ্যোগ ব্যৱস্থাপনা কৰ্তৃপক্ষৰ বিষয়াই জানিবলৈ দিয়ে যে যোৱা দুসপ্তাহৰ বানৰ ফলত মৰিগাঁও, তিনিচুকীয়া, ধুবুৰী, নগাঁও, নলবাৰী, বৰপেটা, ধেমাজি, ওদালগুৰি, গোৱালপাৰা আৰু ডিব্ৰুগড় জিলাত কমেও ২২জন লোকৰ মৃত্যু হৈছে আৰু ৰাজ্যখনত বানত মৃত্যুৰ সংখ্যা ৩৭জনলৈ বৃদ্ধি পাইছে।
আনহাতে, যোৱা ২২মে’ৰ পৰা পৃথক পৃথক ভূমিস্খলনৰ ফলত ২৪জন লোক নিহত হৈছে।
লখিমপুৰ, শিৱসাগৰ, বঙাইগাঁও, হোজাই, ওদালগুৰি, মাজুলী আৰু পশ্চিম কাৰ্বি আংলং জিলাৰ বান পৰিস্থিতিৰ উন্নতি ঘটিছে।
ৰাজ্যিক দুৰ্যোগ ব্যৱস্থাপনা কৰ্তৃপক্ষৰ এগৰাকী বিষয়াই জানিবলৈ দিয়ে যে বানাক্ৰান্ত জিলাকেইখন হৈছে ধেমাজি, বিশ্বনাথ, চিৰাং, দৰং, নলবাৰী, বৰপেটা, কোকৰাঝাৰ, ধুবুৰী, নগাঁও, গোলাঘাট, যোৰহাট, ডিব্ৰুগড়, দক্ষিণ শালমাৰা, গোৱালপাৰা, কামৰূপ, কামৰূপ(মেট্ৰ’), মৰিগাঁও আৰু তিনিচুকীয়া।
বৰ্তমান মুঠ ১,৪১২খন গাঁৱৰ প্ৰায় ১১ লাখ লোক বাৰিষাৰ এই বানত আক্ৰান্ত হৈছে আৰু ৫৩,৩৪৮হেক্টৰতকৈয়ো অধিক খেতিপথাৰ বানৰ ফলত বেয়াকৈ ক্ষতিগ্ৰস্ত হৈছে।
বিষয়াগৰাকীয়ে জানিবলৈ দিয়া মতে, ৰাজ্যখনৰ ১৭১টা সাহায্য শিবিৰত শিশু আৰু মহিলাকে ধৰি ৬,৫৩১জনতকৈয়ো অধিক লোক আশ্ৰয় লৈ আছে।
স্থানীয় প্ৰশাসনৰ লগতে এনডিআৰএফ আৰু এছডিআৰএফৰ কৰ্মীসকলে আক্ৰান্ত লোকসকলৰ উদ্ধাৰ আৰু সাহায্য সেৱাৰ কামত লাগি আছে।
