ৰাজ্যৰ মৎস্যখণ্ডৰ উপযুক্ত বিকাশৰ জৰিয়তে তৃণমূল পৰ্যায়ত অৰ্থনৈতিক ভেটি অধিক সৱল কৰি আত্মনিৰ্ভৰশীল অসম নিৰ্মাণত বিশেষ গুৰুত্ব আৰোপ কৰিছে মুখ্য মন্ত্ৰী সৰ্বানন্দ সোণোৱালে।
কেন্দ্ৰীয় চৰকাৰে নতুনকৈ আৰম্ভ কৰা প্ৰধান মন্ত্ৰী মৎস্য সম্পদ যোজনাৰ সফল ৰূপায়নৰ জৰিয়তে এই লক্ষ্য বাস্তৱায়িত কৰাৰ বাবে শীঘ্ৰে যাৱতীয় পদক্ষেপ ল’বলৈ মীন বিভাগক নিৰ্দেশ দিছে মুখ্য মন্ত্ৰী সোণোৱালে।
মীন বিভাগৰ বিষয়াসকলৰ সৈতে ব্ৰহ্মপুত্ৰ ৰাজ্যিক অতিথিশালাত অনুষ্ঠিত এখন পৰ্যালোচনামূলক বৈঠকত এই যোজনাৰ জৰিয়তে অধিক পুঁজি বিনিয়োগেৰে ৰাজ্যৰ যুৱক-যুৱতী সকলৰ বাবে মৎসখণ্ডত কৰ্মসংস্থাপনৰ নতুন বাট মুকলি কৰিব পৰাকৈ ফলপ্ৰসু পদক্ষেপ ল’বলৈ বিভাগক মুখ্য মন্ত্ৰীয়ে নিৰ্দেশ প্ৰদান কৰে।
উল্লেখযোগ্য যে, কেন্দ্ৰ চৰকাৰে আত্মনিৰ্ভৰ ভাৰত অভিযানৰ অধীনত এই যোজনা ৰূপায়ণৰ বাবে ২০ হাজাৰ কোটি টকা ধাৰ্য্য কৰিছে। এই পুঁজিৰ এক বৃহৎ অংশ যাতে ৰাজ্যখনে লাভ কৰিব পাৰে তথা ৰাজ্যৰ যুৱক-যুৱতীসকল কৰ্ম সংস্থাপনৰ অধিক সুযোগ লাভ কৰিব পাৰে সেই দিশত মুখ্য মন্ত্ৰী সোণোৱালে বৈঠকত গুৰুত্ব আৰোপ কৰে।
এই আঁচনি প্ৰস্তুত কৰোতে মৎস্য পালনৰ ক্ষেত্ৰত বৰ্তমান জনপ্ৰিয় হোৱা আধুনিক পদ্ধতিসমূহৰ লগতে পোণা উৎপাদন কেন্দ্ৰ, ফীড মিল, পূৰ্ণ চক্ৰীয় জল সংৱৰ্দ্ধন, সঁজাত মীন পালন আদি বিভিন্ন মৎস্য পালন পদ্ধতিৰ ওপৰত মুখ্য মন্ত্ৰীয়ে গুৰুত্ব আৰোপ কৰে।
মৎস্য উৎপাদনৰ দিশত বিগত ৪ বছৰে ৰাজ্যখনে লাভ কৰা অগ্ৰগতিৰ প্ৰতি লক্ষ্য ৰাখি মুখ্য মন্ত্ৰী সোণোৱালে ৰাজ্যৰ উৎপাদিত মাছে যাতে চুবুৰীয়া ৰাজ্যৰ মাছৰ বজাৰ দখল কৰিব পাৰে সেই লক্ষ্যৰে কাৰ্য্যপন্থা গ্ৰহণ কৰিবলৈও মীন বিভাগক কয়।
মুখ্য মন্ত্ৰীয়ে কয় যে, ৰাজ্যখনত ২০০০ কোটি টকাৰ মাছৰ এখন বজাৰ আছে আৰু এই বজাৰখন যথেষ্ট সম্ভাৱনাৰ পূৰ্ণ। এই বজাৰখনৰ উপযুক্ত বিকাশ সাধন কৰাৰ লগতে যুৱক-যুৱতীসকলৰ মৎস্য পালনৰ বাবে প্ৰয়োজনীয় দক্ষতা বিকশিত কৰি তোলাটো প্ৰয়োজনীয়।
এই যোজনাখনৰ অধীনত কেন্দ্ৰীয় চৰকাৰে কেন্দ্ৰীয় খণ্ডৰ আঁচনি আৰু কেন্দ্ৰীয়ভাৱে সাহায্যপ্ৰাপ্ত আঁচনিৰ অধীনত মৎস্য পালকসকলক আৰ্থিক অনুদান আগবঢ়াব ফলত মৎস্য পালনৰ ক্ষেত্ৰত পুঁজিৰ সমস্যা নাইকীয়া কৰিব বুলিও মুখ্য মন্ত্ৰীয়ে মত প্ৰকাশ কৰে।
