যোৰহাট জিলাৰ টীয়ক আৰু পূব যোৰহাট ৰাজহ চক্ৰৰ অন্তৰ্গত জাঁজীমুখ অঞ্চলত বানপানীৰ বিভীষিকা আৰম্ভ হৈছে।
ব্ৰহ্মপুত্ৰৰ বাঢ়নী পানীয়ে ইতিমধ্যে দুয়োটা ৰাজহ চক্ৰৰ অন্তৰ্গত প্ৰায় ২০/২৫খন গাঁও বুৰাই পেলোৱাৰ লগতে বহু হেক্টৰ কৃষি ভূমি প্লাৱিত কৰিছে।
বাঢ়নী পানীয়ে ঘৰ দুৱাৰ, নামঘৰ, বিদ্যালয় তথা আচবাব, সা-সম্পত্তি সকলো বুৰাই পেলাইছে। অঞ্চলটোৰ যাতায়তৰ পথ সমূহ এতিয়া পানীৰ তলত।
বাঢ়নী পানীৰ বাবে জাঁজীমুখৰ পাৰঘাটৰ নাঁও চলাচল বন্ধ কৰি দিয়া হৈছে।
বাঢ়নী পানীয়ে জনজীৱন বিপৰ্যস্ত কৰি তোলাৰ সমান্তৰালভাৱে পশুধন সমূহলৈয়ো বিপদ নমাই আনিছে।
ইতিমধ্যে পশুধন সমূহ চাপৰি অঞ্চলৰ পৰা মথাউৰি তথা অন্যান্য ওখ স্থান সমূহলৈ স্থানান্তৰ কৰা হৈছে। তদুপৰি, মানুহৰ লগতে পশুধনৰো খাদ্যৰ সংকট হোৱা পৰিলক্ষিত হৈছে।
ৰাইজে প্ৰশাসনক বিশেষকৈ পশুধনৰ খাদ্য ব্যৱস্থা কৰি দিবলৈ অনুৰোধ জনাইছে।
ইপিনে, বানৰ বিভীষিকাৰ মাজত আবদ্ধ হৈ পৰিছে শ শ বনৰীয়া হাতী।
চৌদিশে পানী আৰু খাদ্যৰ অভাৱত এতিয়া ওখ চাপৰিলৈ গতি কৰিছে হাতীৰ জাকটোৱে। কিন্তু এই পৰিস্থিতিয়ে বানাক্ৰান্ত ৰাইজক অধিক শংকিত কৰি তুলিছে।
