লামডিঙত ক’ভিড-১৯ৰ ফলত আজি এজন ৰোগীৰ মৃত্যু হয়। মহামাৰী ক’ৰ’নাৰ বাবে মৃত্যু হোৱা লামডিঙত এইটো প্ৰথম ঘটনা।
মৃত্যু হোৱা লোকজন অমল শইকীয়া বুলি চিনাক্ত কৰা হৈছে। তেওঁ ৰেইলৱেত কৰ্মৰত আছিল।
লামডিং ৰেইলৱে চিকিৎসালয়ত চিকিৎসাধন হৈ থকা শইকীয়া কিডনীৰ ৰোগত আক্ৰান্ত আছিল।
জানিব পৰা মতে শইকীয়াক প্ৰথমে গুৱাহাটী চিকিৎসা মহাবিদ্যালয় হাস্পতালত ভৰ্তি কৰোৱা হৈছিল আৰু পিছত লামডিং ৰেইলৱে হাস্পতাললৈ নিয়া হয়।
আজি মৃত্যু হোৱা শইকীয়াৰ মৃতদেহ অন্তিম সৎকাৰৰ বাবে হোজাই জিলা প্ৰশাসনে সকলো ধৰণৰ ব্যৱস্থা গ্ৰহণ কৰা বুলি জানিব পৰা গৈছে।
উল্লেখ্য যে শইকীয়াৰ ক’ভিড টেষ্টত প্ৰথমে নিগেটিভ আহিছিল আৰু পিছত অৰ্থাৎ মঙলবাৰে RTPC টেষ্টত তেওঁৰ ৰিপৰ্ট পজিটিভ আহে।
ইফালে তেওঁৰ সংস্পৰ্শলৈ অহা সকলো চিকিৎসক তথা নাৰ্চক কোৱাৰেণ্টাইন কৰাৰ ব্যৱস্থা কৰিছে জিলা প্ৰশাসনে।
উল্লেখ্য যে, ৰাজ্যত এই পৰ্যন্ত ১৮,৬৬৬ গৰাকী লোক ক’ৰ’নাত আক্ৰান্ত হোৱাৰ লগতে মঙলবাৰলৈকে ৪৬ গৰাকী ৰোগীৰ মৃত্যু হোৱাৰ কথা ৰাজ্য চৰকাৰে প্ৰকাশ কৰিছে।
