২৭ ফেব্ৰুৱাৰিত অনুষ্ঠিত হৈ যোৱা মেঘালয় বিধানসভা নিৰ্বাচনৰ ভোটদানৰ হাৰ ৮৪.৮৬ শতাংশলৈ বৃদ্ধি পাইছে। বুধবাৰে মেঘালয় নিৰ্বাচন বিভাগৰ তৰফৰ পৰা এই চূড়ান্ত হাৰৰ কথা জানিবলৈ দিয়ে।
মেঘালয়ৰ মুখ্য নিৰ্বাচনী বিষয়া ফ্ৰেডৰিক খাৰকঙগৰে শ্বিলঙত কালি সংবাদ মাধ্যমক সম্বোধি এই কথা সদৰী কৰে। ৰাজ্যখনত মুঠ ১৮,০৯,৮১৮ ভোটাৰৰ ভিতৰত ১৫,৩৫,৮৪৬ গৰাকী ভোটাৰে ভোটদান সাব্যস্ত কৰে।
উল্লেখ্য যে ৰাজ্যখনত পুৰুষ ভোটাৰতকৈ মহিলা ভোটাৰে অধিক হাৰত ভোটদান সাব্যস্ত কৰা বুলি জানিবলৈ দিয়ে। ৰাজ্যখনৰ ৮৬.৩০ শতাংশ মহিলা ভোটাৰৰ বিপৰীতে ৮৩.৪০ শতাংশ পুৰুষ ভোটাৰে ভোটদান প্ৰক্ৰিয়াত অংশগ্ৰহণ কৰে।
ইফালে চূড়ান্ত ভোটদানৰ হাৰ প্ৰকাশ কৰাৰ পূৰ্বে নিৰ্বাচন বিভাগে মঙলবাৰে ৰাজ্যখনত ৭৭.৬৬ শতাংশ ভোট দান সাব্যস্ত হোৱা বুলি জানিবলৈ দিছিল।
স্মৰ্তব্য যে ডাক বেলট যোগে ভোটদান কৰা ভোটাৰৰ হাৰ ইয়াত অন্তৰ্ভুক্ত নহয়। ইয়াৰ উপৰি ৱিলিয়াম আৰু ৰলিয়াং সমষ্টিৰ অন্তৰ্গত কিংদং টিউবাৰ ভোটকেন্দ্ৰৰ নিৰ্বাচন স্থগিত হোৱা বাবে প্ৰকাশ কৰা চূড়ান্ত ভোটাৰ হাৰত অন্তৰ্ভুক্ত কৰা হোৱা নাই বুলি জনায় মুখ্য নিৰ্বাচনী বিষয়াজনে।
মন কৰিবলগীয়া যে নিৰ্বাচনৰ কিছু দিন পূৰ্বে ৱিলিয়ামনগৰৰ এন চি পি প্ৰাৰ্থী জনাথন চাংমাক কোনো অচিনাক্ত দুৰ্বৃত্তই হত্যা কৰাৰ বাবে উক্ত সমষ্টিটোত নিৰ্বাচন আয়োগে সাময়িকভাবে নিৰ্বাচন স্থগিত ৰাখিছে।
ইয়াৰ বিপৰীতে ৰলিয়াং সমষ্টিৰ অন্তৰ্গত কিংদং টিউবাৰ ভোটকেন্দ্ৰত নিৰ্বাচনৰ দিনা ইলেকট্ৰনিক ভোটিং মেচিন(EVM) বিকল হৈ পৰাৰ বাবে ভোটদান স্থগিত ৰাখে।
জানিব পৰা মতে ৰলিয়াং সমষ্টিৰ অন্তৰ্গত কিংদং টিউবাৰ ভোটকেন্দ্ৰত আজি ৰাতিপুৱা ৭ বজাৰ পৰা পুনৰ ভোটদান প্ৰক্ৰিয়া আৰম্ভ হোৱা বুলি জানিব পৰা গৈছে।
উল্লেখ্য যে মেঘালয় নিৰ্বাচনৰ ফলাফল অহা ৩ মাৰ্চত ঘোষণা কৰিব।
