“কংগ্ৰেছ আৰু কিছুমান পাৰ্টিয়ে দুৰ্যোগৰ সময়তো ৰাজনীতি কৰি আছে। তেওঁলোকে এতিয়া গ’ল ঢালি থাকক, কিন্তু কোভিড পাৰ হোৱাৰ পাছত সদায় ১০০ টাকৈ গ’ল দিম।” GMCHৰ কোভিড সম্পৰ্কীয় এক অনুষ্ঠানত ভাগ লৈ সংবাদ মাধ্যমৰ আগত বিৰোধী দল-সংগঠনক উদ্দেশ্যি মঙলবাৰে এইদৰে কয় স্বাস্থ্য মন্ত্ৰী ডঃ হিমন্ত বিশ্ব শৰ্মাই।
তেওঁ কয়, “দেৱব্ৰত শইকীয়া, তৰুণ গগৈ আৰু কোনোবা ডব্লিউ নে কি মই সকলো শুনি আছো আৰু ১০০-১০০টা গ’ল ক’ৰ’ণা শেষ হ’লে এদিন এদিনত দিম। তেওঁলোকে খালী গ’লপোষ্টত যিমান পাৰে মাৰি লওক। ক’ৰ’ণা শেষ হোৱাৰ পাছত মোক ৰাখি চাওক।”
বিৰোধী দলপতি দেৱব্ৰত শইকীয়াক উদ্দেশ্য কৰি মন্ত্ৰী শৰ্মাই পুনৰ কয়, “বিৰোধী দলপতিৰ কাম কি যে ক’ৰ’ণাত মানুহৰ মৃত্যু হ’ব লাগে। এতিয়া মোৰ ওপৰতো অভিযোগ আনি থাকিব যাতে মই দুখ কৰি ঘৰত সোমাই যাওঁ। বানপানীত টকা পোৱা নাই, অফিচাৰে কাম কৰা নাই এইবোৰ কথা কৈ থাকিব।”
“তেনেকৈ ক’লে মানুহবোৰে কাম নকৰা হ’ব মানুহবোৰ ঘৰত বহি যাব। তেতিয়া পৰিৱেশটো বেয়া হৈ গ’লে তেওঁলোকে ৰাজনৈতিক মুনাফা পাব। মই ভাবিছিলো দুৰ্যোগৰ মাজত ৰাজনীতি নহয়,” তেওঁ লগতে কয়।
ইপিনে কেন্দ্ৰই প্ৰথমতেই ৩০০ কোটি টকা পঠিয়াই দিছিল গতিকে বান সহায্যৰ ক্ষেত্ৰত এইবাৰ কোনো অসুবিধা হোৱা নাই বুলি মন্ত্ৰীগৰাকীয়ে সদৰী কৰে।
