২১ জুলাইত স্বাস্থ্য মন্ত্ৰী ডঃ হিমন্ত বিশ্ব শৰ্মাই বিৰোধী দলপতি দেৱব্ৰত শইকীয়াই ক’ৰ’না ভাইৰাছৰ সংক্ৰমণ চলি থকাৰ সময়তো ৰাজনীতি কৰা বুলি কটাক্ষ কৰিছিল।
মন্ত্ৰী শৰ্মাৰ কটাক্ষৰ পাছতে এক ফেইচবুক পোষ্টযোগে পুনৰ স্বাস্থ্য বিভাগ আৰু ৰাজ্য চৰকাৰৰ বিৰুদ্ধে সৰৱ হৈ পৰিছে দেৱব্ৰত শইকীয়া।
“চৰকাৰৰ ভুল আঙুলিয়াই দিয়াটো বিৰোধী দলৰ দায়িত্ব আৰু কৰ্তব্য কাৰণ, এনে সমালোচনাৰ দ্বাৰা এখন চৰকাৰক বৰ্তমানতকৈ অধিক উন্নত সেৱা জনসাধাৰণৰ প্ৰতি আগবঢ়াবলৈ বিৰোধীয়ে চৰকাৰক বাধ্য কৰাব পাৰে,” হিমন্তই কটাক্ষ কৰাৰ পাছতে মঙলবাৰে নিশা এক ফেইচবুক পোষ্টযোগে এইদৰে কয় বিৰোধী দলপতি গৰাকীয়ে।
ৰাজ্য চৰকাৰলৈ কেইটামান প্ৰত্যাহ্বান জনাই শইকীয়াই কয়, “বৰ্তমানৰ বান পৰিস্থিতিৰ সৈতে মোকাবিলা কৰিবলৈ অসম চৰকাৰৰ কিমান পুঁজি মজুত আছে জনাওক।
অসম চৰকাৰে কোন সকল বিশেষজ্ঞৰ লগত পৰামৰ্শ কৰি ক’ৰ’না সম্পৰ্কীয় নীতি নিৰ্দেশনা জাৰি কৰিছে, সেই বিশেষজ্ঞ সকলৰ নাম আৰু তেখেত সকলৰ বাবে গঠন কৰা পৰামৰ্শদাতা সমিতি আদিৰ চৰকাৰী জাননী সমূহ ৰাজহুৱা কৰাৰ বাবেও দেবব্ৰত শইকীয়াই প্ৰত্যাহ্বান জনায় স্বাস্থ্য মন্ত্ৰী গৰাকীক।
ইয়াৰোপৰি, চাৰি বছৰ মান আগত অসম মেডিকেল চাৰ্ভিছ কৰ্পোৰেশ্যন গঠন কৰাৰ কথা বিধান সভাত ঘোষণা কৰা হৈছিল বুলি উনুকিয়াই দি দেৱব্ৰত শইকীয়াই এই কৰ্পোৰেশ্যনৰ দ্বাৰা বিভিন্ন সামগ্ৰী স্বাস্থ্য বিভাগে স্বচ্ছ ভাবে ক্ৰয়-বিক্ৰয় কৰিব বুলি অসমৰ ৰাইজক অসম চৰকাৰে প্ৰতিশ্ৰুতি দিছিল বুলি উল্লেখ কৰি অসম চৰকাৰে প্ৰতিশ্ৰুতি সমূহ পুৰণ কৰিব বুলি আশা প্ৰকাশ কৰিছে বুলিও লগতে কয়।
